Վարկատուների հետ Հունաստանի համաձայնագիրը դժվարին որոշումներ կպահանջի բոլոր կողմերից. ԱՄՀ

Լրացուցիչ ֆինասավորման և պարտային հիմնախնդրի լուծման շուրջ վարկատուների հետ Հունաստանի համաձայնագիրը դժվարին որոշումներ կպահանջի բոլոր կողմերից: Այդ մասին, ինչպես տեղեկացնում է «Արմենպրես»-ը, հայտարարել է Արժույթի միջազգային հիմնադրամի ներկայացուցիչը:

«Հուսալի համաձայնագիրը դժվարին որոշումներ կպահանջի բոլոր մասնակիցներից»,- գրել է ԱՄՀ-ի գլխավոր տնտեսագետ Օլիվիե Բլանշարը հաստատության պաշտոնական բլոգում այն բանից հետո, երբ Հունաստանի և նրա վարկատուների ներկայացուցիչների միջև բանակցությունների՝ հունիսի 14-ին Բրյուսելում կայացած հերթական փուլն ավարտվել է անարդյունք:

Մի քանի շաբաթ Է, ինչ Հունաստանը և վարկատուները (Եվրահանձնաժողով, Եվրոպայի կենտրոնական բանկ և ԱՄՀ) փորձում են պայմանավորվածության հասնել խնայողության այն անհրաժեշտ միջոցառումների շուրջ, որոնք հույներին առաջարկվում է իրականացնել՝ նրանց 7,2 մլրդ եվրո գումարի վարկային ծրագրի վերջին մասնաբաժնի փոխանցման դիմաց: Առանց այդ միջոցների Աթենքը հազիվ թե կարողանա մինչև հունիսի վերջը 1,6 մլրդ եվրոյի հերթական վճարումը կատարել ԱՄՀ-ին:

Բլանշարի խոսքով՝ համաձայնագիրը հնարավոր կլինի միայն այն դեպքում, եթե Հունաստանի կառավարությունը համաձայնի բարձրացնել մի շարք կատեգորիաների ապրանքների հավելադիր արժեքի հարկը և իրականացնել թոշակների նոր կրճատումներ՝ «բարելավելու երկրի ֆինանսները, որը գտնվում է սնանկացման եզրին»:

Իր հերթին Հունաստանի կառավարությունը գտնում է, որ ավելացված արժեքի հարկի բարձրացումը և թոշակների կրճատումը կբերեն ռեցեսիայի ուժեղացման և կփոքրացնեն տնտեսական աճի հնարավորությունները և, համապատասխանաբար, պետբյուջե միջոցների ստացումը՝ պարտքի վճարման համար:

Իր հերթին Եվրահանձնաժողովը կարծիք է հայտնել, որ Հունաստանի պատվիրակության կողմից Բրյուսելում ներկայացված առաջարկներն ամբողջական չեն: «Ուստի հետագա բանավեճն այժմ պետք է շարունակվի Եվրոխմբի շրջանակներում», որը նիստ է գումարելու հունիսի 18-ին, հաղորդել է ՏԱՍՍ-ը: