Միշել Օբաման ժամանել է Լոնդոն՝ հանդիպելու Դևիդ Քեմերոնի և արքայազն Հարիի հետ

ԱՄՆ-ի առաջին տիկին Միշել Օբաման երկօրյա այցով ժամանել է Լոնդոն, որի շրջանակներում նա կանանց կրթության հիմնախնդիրները կքննարկի Մեծ Բրիտանիայի վարչապետ Դևիդ Քեմերոնի հետ, իսկ զինծառայողների ընտանիքների աջակցման հարցերը՝ արքայազն Հարիի հետ, տեղեկացնում է «Արմենպրես»-ը:

Բարաք Օբամայի տիկինն ինքնաթիռով հունիսի 15-ի երեկոյան Մեծ Բրիտանիա է ժամանել երկու դեռահաս դուստրերի՝ Մալիայի ու Սաշայի և մոր՝ Մարիան Ռոբինսոնի ընկերակցությամբ: Օդանավակայանում առաջին տիկնոջը դիմավորել են ամերիկացի զինծառայողների կանայք ու երեխաները, որոնց հետ զրույցով Միշել Օբաման բացել է այցի ծրագիրը:

Հունիսի 16-ի ցերեկը ԱՄՆ-ի նախագահի տիկինը Մեծ Բրիտանիայի նախարարների կաբինետի ղեկավար Դևիդ Քեմերոնի և նրա տիկնոջ՝ Սամանթայի հետ թեյ է խմելու վարչապետի՝ Դաունինգ սթրիթի պաշտոնական նստավայրում:

Ավելի վաղ Financial Times թերթի սյունակում Միշել Օբաման գրել էր, որ պատրաստվում է Քեմերոնների հետ քննարկել այն խնդիրները, որոնց պատճառով ավելի քան 62 մլն աղջիկներ աշխարհի երրորդ երկրներում չեն կարողանում դպրոց հաճախել: Այս «աղաղակող անարդարության» պատճառների թվում Միշել Օբաման նշել է հարկադրական ամուսնությունները, վաղ հղիությունները, բռնությունը և սեքսիզմը:

Բարաք Օբամայի տիկինը կայցելի Լոնդոնի դպրոցներից մեկը, որտեղ կպատմի ամուսնու հետ համատեղ Let Girls Learn նախաձեռնության մասին, ինչպես նաև կհանդիպի իր վաղեմի ծանոթին՝ ՈՒելսի արքայազն Չառլզի կրտսեր որդուն՝ Հարիին, որի հետ նա երկու տարի առաջ Սպիտակ տանը թեյախմություն էր կազմակերպել զինծառայողների մայրերի համար:

Միշել Օբաման Մեծ Բրիտանիայից կուղևորվի Իտալիա, որտեղ հանդիպում կունենա Եվրոպայում բազավորված ամերիկացի զինծառայողների ընտանիքների հետ: Միշել Օբաման Իտալիայում նաև կարծարծի իրեն հուզող ևս մեկ թեմա՝ երեխաների առողջ սննդի հարցը, հաղորդել է ՌԻԱ Նովոստին:

Լուսանկարը' EPA