Պուտինը խոստացել է հարվածային միջոցներ ուղղորդել Ռուսաստանին սպառնացող երկրների դեմ

Վլադիմիր Պուտինը հայտարարել է, որ սպառնալիքի դեպքում Ռուսաստանը հարվածային միջոցներ կուղղորդի վտանգի աղբյուրի վրա: Պետության ղեկավարի խոսքը փոխանցել է «Ինտերֆաքս» գործակալությունը, տեղեկացնում է «Արմենպրես»-ը:

«Եթե որևիցե մեկը սպառնալիքի տակ դնի Ռուսաստանի տարածքը, նա իր սպառազինությունները պետք է ուղղի այն երկրների դեմ, որտեղից այդ սպառնալիքը ծագում է»,- ասել է Ռուսաստանի նախագահը:

Նա հիմնավորված է համարել Մոսկվայի պատասխան գործողությունները հակահրթիռային պաշտպանության ծավալման դեմ: «Այդ ՆԱՏՕ-ն է մոտենում մեր սահմաններին, այլ ոչ թե մենք»,- պարզաբանել է նա:

Միևնույն ժամանակ նա նշել է, որ Եվրոպայում սպառազինությունների հնարավոր տեղաբաշխման վերաբերյալ Արևմուտքի հայտարարություններն ավելի շուտ «քաղաքական նշաններ» են, որոնք պատասխան միջոցներ չեն պահանջում:

Պուտինն ընդգծել է, որ Ռուսաստանը չի սպառնում Եվրոպայի երկրներին: Նախագահի խոսքով՝ նրանց համար անվտանգության լավագույն երաշխիքը չեզոքությունն է:

ԱՄՆ-ի պետքարտուղար Ջոն Քերին անհանգստություն է հայտնել Պուտինի այն հայտարարության առիթով, թե Ռուսաստանը մինչև տարեվերջ կջանա միջուկային զինանոցը համալրել 40 նոր միջմայրցամաքային բալիստիկ հրթիռներով: «Ոչ ոք չի կարող նման խոսք լսել ուժեղ տերության ղեկավարից և չմտահոգվել այն բանից, թե ինչ հետևանքներ դա կունենա»,- Քերիի խոսքը փոխանցել է Reuters գործակալությունը:

Հունիսի սկզբին հաղորդվել է, որ Վաշինգտոնը քննարկում է Եվրոպայում միջուկային մարտագլխիկներով ցամաքային բազավորման թևավոր և բալիստիկ հրթիռների տեղաբաշխման հնարավորությունը: Այդ ծրագիրը դրական է գնահատել Մեծ Բրիտանիայի արտգործնախարարությունը: