ՆԱՏՕ-ն շահագրգռված չէ սպառազինությունների մրցավազքով և Ռուսաստանի հետ առճակատմամբ. Ստոլտենբերգ

Հյուսիսատլանտյան դաշինքը շահագրգռված չէ սպառազինությունների նոր մրցավազքով և Ռուսաստանի հետ առճակատմամբ: Այդ մասին, ինչպես տեղեկացնում է «Արմենպրես»-ը, հունիսի 17-ի երեկոյան նորվեգացի լրագրողներին հայտարարել է Լեհաստան ժամանած ՆԱՏՕ-ի գլխավոր քարտուղար և Նորվեգիայի նախկին վարչապետ Ենս Ստոլտենբերգը:

«Մենք չենք ցանկանում սպառազինությունների մրցավազք, չենք ցանկանում առճակատում,- գլխավոր քարտուղարի խոսքը մեջբերել է Նորվեգիայի հեռագրական Բյուրոն:- Այն ժամանակ, երբ մենք պաշտպանում ենք Եվրոպայում սովորական սպառազինությունների մասին պայմանագիրը, Ռուսաստանը դուրս է գալիս դրանից»:

Լեհաստանի արևմտյան մասում ներկայում ընթանում են ՆԱՏՕ-ի արագ հակազդման ուժերի Noble Jump զորավարժությունները: Դաշինքի գլխավոր քարտուղարը հունիսի 18-ին անձամբ պետք է այցելի Ժագան-Սվետոշուֆ զինափորձարան, որտեղ ընթանում են վարժանքները:

Ավելի վաղ The Wall Street Journal թերթի էլեկտրոնային տարբերակում հրապարակված հոդվածում ՆԱՏՕ-ի գլխավոր քարտուղարը և Եվրոպայում ՆԱՏՕ-ի միացյալ զինված ուժերի գլխավոր հրամանատար, ամերիկացի գեներալ Ֆիլիպ Բրիդլավը նշել են, որ Ռուսաստանի քաղաքականությունը մարտահրավեր է Հյուսիսատլանտյան դաշինքի և «սառը պատերազմի» ավարտից հետո հաստատված աշխարհակարգի համար:

«Մեզնից հարավ «Իսլամական պետությունը» և մյուս ծայրահեղական խմբերը քաոս են սերմանում և ահաբեկչական գրոհների սադրում Փարիզից մինչև Թեքսաս,- նշում Ստոլտենբերգը և Բրիդլավը: Արևելքում Ռուսաստանն իր կամքը հարևաններին է պարտադրում առանց նրանց ինքնիշխանությունը հաշվի առնելու»: «Այս նոր և արագորեն փոփոխվող իրադրությունում ՆԱՏՕ-ն պետք է արագորեն հակազդի և արագորեն իրագործի որոշումները»,- ընդգծում են նրանք, հաղորդել է ՏԱՍՍ-ը: