Ադրբեջանում շարունակվում է «Ամեն տանը հացադուլի ակցիան»

Ադրբեջանի Մասալլըի շրջանում մի խումբ մտավորականներ և հասարակության ներկայացուցիչներ արդեն 8 օր հացադուլ են անցկացնում:

Ինչպես հաղորդում է «Արմենպրես»-ը, «Ազադլըգ» ռադիոկայանի հետ զրույցում ակցիայի մասնակիցները պատմել են, որ «Ամեն տանը հացադուլի ակցիան» սկսել են հունիսի 10-ից' ի բողոք շրջանի ղեկավարության կողմից արվող անօրինակությունների:

Նրանց խոսքով՝ ակցիային միացել են շրջկենտրոնի և գյուղերի տասնյակ բնակիչներ:

«Մասալլըի մտավորականների միության» նախագահ Մամմադաղա Էյնուլլաևը ռադիոկայանին պատմել է, որ շրջանում տեղի ունեցող ապօրինությունների հետ կապված՝ մի քանի անգամ դիմել են պատկան մարմիններին, սակայն արդյունք չի եղել: Նա ասել է, որ վերջին անգամ անցյալ ամիս եղել են Նախագահի աշխատակազմում և բողոքել շրջանի գործադիր ղեկավար Ռաֆիլ Հուսեյնովից:

«Պետբյուջեից, Նավթի հիմնադրամից մեր շրջանի բարեկարգման համար ֆինանսական միջոցներ են հատկացվել, որոնք յուրացվում են, գործադիր ղեկավարն այդ փողերով իր համար անձնական օբյեկտներ է կառուցում: Վերջին անգամ 30 հոգով Նախագահի աշխատակազմում եղել ենք մայիսի 25-ին: Այնտեղից դուրս գալուց հետո մամուլի կոնֆերանս կազմակերպեցինք և հայտարարեցինք, որ եթե մինչև հունիսի 10-ը չհետաքրքրվեն մեր բողոքով, հացադուլ ենք սկսելու: Մեզնով հետաքրքրվող չեղավ, մենք էլ 60-70 հոգով հացադուլի ակցիա ենք սկսել: Մենք հավաքվելու տեղ չունենք, այդ պատճառով ակցիան անցկացնում ենք տներում: Առանց այն էլ բողոքների պատճառով հետապնդումների ենք ենթարկվել: Վախենում ենք հավաքվել մեկ տեղում»,- ասել է Էյնուլլաևը:

Շրջանի Հուսեինհաջըլը գյուղի բնակիչ Յագուբ Քազըմլըն ասում է, որ առողջությունը վատանալու պատճառով ակցիան կարողացել է ընդամենը 4 օր շարունակել:

«Ռաֆիլ Հուսեյնովը իրեն պահում է որպես Մասալլըի տեր ու տնօրեն: Կարծես շրջանն իր հոր ունեցվածքն է: Եթե մեր բողոքով հետաքրքրվող չլինի, հրաժարվելու ենք Ադրբեջանի քաղաքացիությունից և ապաստան ենք խնդրելու արտասահմանյան դեսպանատներից: Հուսեյնովն ասում է, որ իր մեջքին կանգնած պաշտոնյաներ կան: Անտառը կտրտեց և իր համար ասֆալտի գործարան ու քաղցրավենիքի ֆաբրիկա կառուցեց: Խանութպաններին ստիպում է վաճառել իր արտադրանքը՝ հակառակ դեպքում սպառնալով, որ կփակի խանութը: Չգիտենք՝ ում պատմենք մեր ցավը»,- ասում է նա:

Քոչեքլի գյուղի բնակիչ Նաթիգ Մամմադովն ասում է, որ չնայած կան մասնակիցներ, որոնց առողջական վիճակն ակցիայի ժամանակ վատանում է, սակայն, բժիշկները չեն այցելում նրանց:

«Իմ առողջությունն էլ է վատացել: Ոչ մի բժիշկ մեզնով չի հետաքրքրվում: Այնպես են իրենց պահում, կարծես ակցիա չի անցկացվում՝ չնայած ակցիայի մասին նախապես հայտարարել ենք»,- ասում է նա: