MERS-ի բռնկման պատճառով կտրուկ ընկել է Հարավային Կորեայի նախագահի վարկանիշը

Հարավային Կորեայի նախագահ Պան Կին Հեի վարկանիշը մինչև 29 տոկոս է ընկել երկրում MERS կորոնավիրուսի բռնկման ֆոնին, որից մահացել է ավելի քան 20 մարդ, տեղեկացնում է «Արմենպրես»-ը՝ հղում անելով BBC-ին:

Gallup սոցիոլոգիական ընկերության տվյալների համաձայն՝ երկու շաբաթվա ընթացքում երկրի այն քաղաքացիների թիվը, ովքեր պաշտպանում էին նախագահին, կրճատվել է 10 տոկոսով:

Հարցվածները որպես Պան Կին Հեի գործունեությունից դժգոհության հիմնական պատճառ նշում են ուշացած արձագանքը կորոնավիրուսի բռնկմանը:

Պան Կին Հեն Հարավային Կորեայի նախագահի պաշտոնն ստանձնել է 2013 թվականի փետրվարին: Ներկայիս վարկանիշն ամենացածրն է դարձել նրա լիազորություններն սկսվելուց ի վեր ամբողջ ժամանակաշրջանում:

Ընդամենն այսօրվա դրությամբ MERS-ի վիրուսից մահացել է 24 մարդ: Եվս 166-ի մոտ հաստատվել է այդ հիվանդության առկայությունը: Դրա հետ մեկտեղ Կորեայի իշխանությունները գտնում են, որ վիրուսի ակտիվ տարածումը հաջողվել է կանգնեցնել:

Ավելի վաղ Կորեայի տուրիստական կազմակերպությունը հաղորդել է, որ շուրջ 120 հազար օտարերկրյա զբոսաշրջիկներ են հրաժարվել Կորեայի Հանրապետություն ուղևորությունից այդ երկրում մերձավորարևելյան շնչառական համախտանիշի կորոնավիրուսի (MERS) տարածման պատճառով:

Նրա տվյալներով՝ միայն հունիսի առաջին տասն օրվա ընթացքում Հանրապետություն այցելող ճանապարհորդների թիվն անցյալ տարվա համապատասխան ժամանակաշրջանի համեմատությամբ կրճատվել է 20 տոկոսով: Այդ պատճառով երկրի տուրիստական սեկտորի կորուստները կազմել են առնվազն 11 մլն դոլար:

Հարավկորեական երկու խոշորագույն ավիաընկերությունները՝ Korean Air-ը և Asiana Airlines-ը, հաղորդել են Կորեայի Հանրապետությունում ավիատոմսերի պահանջարկի կտրուկ անկման մասին: Այդ կապակցությամբ Korean Air-ը պլանավորում է չեղյալ հայտարարել Հարավային Կորեան Չինաստանի հետ կապող 17 ավիաերթուղի՝ փոխադրումները կրճատելով 66 հազար ուղևորատեղով: Asiana Airlines-ն արդեն չեղյալ է հայտարարել հունիսին պլանավորված 52 չվերթ:

Մինչդեռ Առողջապահության համաշխարհային կազմակերպությունը հայտարարել է, որ Կորեայի Հանրապետությունում MERS-ի հարուցած հիվանդության բռնկումը գլոբալ սպառնալիք չի ներկայացնում, այլ միայն ազդանշան է ինֆեկցիոն հիվանդություններին հակազդելու գործում միջոցներ ձեռնարկելու համար: «Բռնկումն սթափվելու ազդանշան է և նախազգուշացնում է, որ չափազանց մոբիլ աշխարհում բոլոր երկրները պետք է միշտ պատրաստ լինեն այդ և ինֆեկցիոն այլ լուրջ հիվանդությունների բռնկումներին»,- նշվում է կազմակերպության հայտարարության մեջ: