Եվրամիությունը երկարացրեց Ռուսաստանի դեմ սահմանված պատժամիջոցները

Եվրամիության խորհուրդը՝ արտաքին գործերի նախարարների մակարդակով, Ռուսաստանի դեմ սահմանված տնտեսական պատժամիջոցների գործողության ժամկետը երկարացրել է վեց ամսով: Այդ մասին, ինչպես տեղեկացնում է «Արմենպրես»-ը, հաղորդել է ԵՄ-ի արտաքին քաղաքական ծառայությունը: «Սահմանափակիչ միջոցների երկարացման որոշումն ընդունված է»,- նշել են ծառայությունում:

ՌԴ-ի նկատմամբ ԵՄ-ի տնտեսական պատժամիջոցները սահմանափակումներ են ներառում Ռուսաստանի գլխավոր պետական բանկերի, պաշտպանական ձեռնարկությունների և նավթարդյունաբերության ձեռնարկությունների վարկավորման ոլորտում:

Բացի այդ, ԵՄ-ն սահմանափակումներ է դրել ՌԴ-ին զենքի ու ռազմական տեխնիկայի, ռազմական տեխնոլոգիաների և կրկնակի նշանակության տեխնոլոգիաների, ինչպես նաև բարձրտեխնոլոգիական սարքավորումների և նավթի արդյունահանման տեխնոլոգիաների մատակարարումների վրա:

ԵՄ-ի սահմանափակիչ միջոցները չեն վերաբերել Ռուսաստանի գազի արդյունաբերությանը:

Եվրամիության կողմից Ռուսաստանի նկատմամբ պատժամիջոցները սահմանվել են 2014 թվականի օգոստոսի 1-ից: Դրանք խստացվել են սեպտեմբերին և մեղմացվել հոկտեմբերին, երբ ՌԴ-ի նկատմամբ վարկային սահմանափակումների գործողությունից ԵՄ-ի խորհրդի առանձին որոշմամբ մասնակիորեն դուրս են բերվել Ռուսաստանի պետական բանկերի եվրոպական «դուստրերը», հաղորդել է ՏԱՍՍ-ը: