2015 թվականի սկզբից Ադրբեջանի ԶՈՒ կորուստը կազմել է 38 մարդ. «Խազար» ինստիտուտ

Ադրբեջանի պաշտպանության և անվտանգության հատվածի կորուստները 2015 թվականի առաջին 6 ամիսների ընթացքում կազմել են 38 մարդ: Նրանցից 15-ը մարտական, 23-ը' ոչ մարտական կորուստներ են:

Այս մասին, ինչպես հաորդում է «Արմենպրես»-ը' վկայակոչելով contact.az լրատվական կայքը, հայտնում է ադրբեջանական «Խազար» ռազմական հետազոտությունների ինստիտուտը' հղում կատարելով ադրբեջանական ԶԼՄ-ների և սոցցանցերի մոնիտորինգի տվյալներին:

Նույն աղբյուրի համաձայն' 7 զինծառայող ինքնասպանություն են գործել, 6-ը դարձել են ոչ կանոնադրական հարաբերությունների զոհեր (ծառայակիցների կողմից գնդակահարություն), 3-ը զոհվել են անզգուշության հետևանքով, 2-ն ընկել են ձնահոսքի տակ, 1-ը մահացել է հիվանդությունից:

Մահացածներից 32-ը պաշտպանության նախարարության, 3-ը' պետական սահմանային ծառայության, 2-ը' արտակարգ իրավիճակների, 1-ը' ազգային անվտանգության նախարարության զինծառայողներ են:

Նշված ժամանակաշրջանում վիրավորվել կամ տարբեր մարմնական վնասվածքներ են ստացել 7 զինծառայող: Նրանցից 4-ը վիրավորվել են առաջնագծում, մեկը պայթել է ականի վրա, մեկը տուժել է ոչ կանոնադրական փոխհարաբերությունների արդյունքում, ևս մեկը' դժբախտ պատահարից:

Ինստիտուտը չի բացառում, որ պաշտպանության և անվտանգության հատվածի իրական կորուստներն ավելի շատ են, քան իր հրապարակածը:

«Խազար» ռազմական հետազոտությունների ինստիտուտը ստեղծվել է 2014 թվականին Գերմանիայում Ջասուր Սումերենլիի կողմից, ով Ադրբեջանում հետապնդումների է ենթարկվել և հարկադրված է եղել ապաստան փնտրել:

Կառույցի նպատակը Կասպյան ավազանում պաշտպանության և անվտանգության հատվածներում գործընթացների վերլուծությունն ու ռազմավարական կանխատեսման պատրաստումն է:

2015 թվականի սկզբից մինչ այժմ Ադրբեջանի պետական կառույցները խոստովանել են 16 զինծառայողների մահը: Պաշտոնական տվյալներով' նրանցից 10-ը մահացել են ոչ մարտական պայմաններում:

Թեև Ադրբեջանը շարունակում է սեփական զինուժում գրանցված մահվան դեպքերի ու արտակարգ պատահարների մասին տեղեկությունները թաքցնելու քաղաքականությունը, այդուհանդերձ, ՀՀ ՊՆ և ԼՂՀ ՊԲ կողմից սեփական միջոցներով ձեռք բերված տեղեկությունների համաձայն' տարվա սկզբից մինչ այժմ ադրբեջանական բանակի կորուստը կազմել է առնվազը 79 զինծառայող և 30-ից ավելի վիրավոր: