Հիշատակի և վշտի օրը Պուտինը հարգել է Հայրենական մեծ պատերազմում ընկածների հիշատակը

Ռուսաստանի նախագահ Վլադիմիր Պուտինը Հիշատակի և վշտի օրը հարգել է Հայրենական մեծ պատերազմում ընկածների հիշատակը: Պետության ղեկավարն Ալեքսանդրյան այգում ծաղեպսակ է դրել Անհայտ զինվորի շիրիմի Հավերժական կրակի մոտ, տեղեկացնում է «Արմենպրես»-ը:

Սգո երաժշտության հնչյունների ներքո Պատվո պահակախմբի վաշտի զինվորները տարել են մեխակներով և վարդերով հյուսված ծաղկեպսակը՝ երիզված Ռուսաստանի դրոշի եռագույն ժապավենով՝ «Անհայտ զինվորին Ռուսաստանի Դաշնության նախագահից» մակագրությամբ: Պուտինը մոտեցել է ծաղկեպսակին, ուղղել ժապավենները և խոնարհել գլուխը Հայրենական մեծ պատերազմի տարիներին միլիոնավոր ընկածների հիշատակին: Դրանց հետո հնչել է Ռուսաստանի Դաշնության օրհներգը:

Ինչպես նշում է ՏԱՍՍ-ը, պետության ղեկավարի հետ մեկտեղ սգո արարողությանը մասնակցել են ՌԴ-ի վարչապետ Դմիտրի Մեդվեդևը, Դաշնության խորհրդի և Պետդումայի խոսնակներ Վալենտինա Մատվիենկոն և Սերգեյ Նառիշկինը, նախագահի վարչակազմի ղեկավար Սերգեյ Իվանովը, պաշտպանության նախարար Սերգեյ Շոյգուն, կառավարության անդամներ և խորհրդարանականներ:

Դրանից անմիջապես հետո «Ելի՜ր, երկիր հսկայական» լեգենդար երգի հնչյունների ներքո, որը կատարում էր զինվորական նվագախումբը, արարողությունը շարունակվել է Մոսկվայի կայազորի հանդիսավոր երթով, որը ներկայացնում են զինված ուժերի երեք տեսակներ՝ ցամաքային զորքերը, ռազմաօդային ուժերը և ռազմածովային նավատորմը:

Այնուհետև նախագահը մեխակներ է դրել հերոս քաղաքների հուշարձաններից յուրաքանչյուրի մոտ՝ հարգելով դրանց պաշտպանների հիշատակը:

1941 թվականի հունիսի 22-ի լուսաբացին ֆաշիստական Գերմանիան առանց պատերազմ հայտարարելու հարձակվեց Խորհրդային Միության վրա: Առաջին իսկ օրը զոհվեցին Կարմիր բանակի հազարավոր զինծառայուղներ և խաղաղ բնակիչներ, ոչնչացվեցին 1,2 հազար ինքնաթիռ, տանկ և հրանոթ: Վերջին պաշտոնական տվյալներով՝ պատերազմում զոհվել են ավելի քան 26 միլիոն խորհրդային քաղաքացիներ և զինծառայողներ: