Պակիստանում հաստատված անոմալ շոգն ավելի քան 570 մարդու կյանք է խլել

Պակիստանի հարավում հաստատված անոմալ շոգից մահացածների թիվը հասել է 572-ի: Այդ մասին, ինչպես տեղեկացնում է «Արմենպրես»-ը, հաղորդել է News International պակիստանյան թերթը:

Ավելի վաղ հաղորդվել էր շոգի պատճառով 474 մահացածների մասին: Կարաչիում անցած հանգստյան օրերին ջերմաչափի սյունը հասել է ըստ Ցելսիուսի 45 աստիճանի նշագծին: Ավելի վաղ նշվել է, որ հունիսի 22-ին տեղացած անձրևը փոքր-ինչ նվազեցրել է օդի ջերմաստիճանը:

Թերթի տեղեկատվության համաձայն՝ սաստկացող տապի պայմաններում էլեկտրաէներգիայի տևական անջատումները հակակառավարական ակցիաներ են հրահրել երկրի մի շարք շրջաններում:

Սպասվում է, որ առաջիկա օրերին Պակիստանի բազմաթիվ տարածաշրջաններում հնարավոր են հորդառատ անձրևներ: Չնայած դրան, շոգի նոր ալիք է կանխատեսվում առաջիկա շաբաթվա ընթացքում, հաղորդել է ՌԻԱ Նովոստին: