Ֆրանսիայում մուսուլման կանանց արգելվել է աշխատանքային օրերին գնումներ անել

Ֆրանսիայի Բորդո քաղաքում մթերային խանութը մուսուլման կանանց արգելել է գնումներ կատարել աշխատանքային օրերին, իսկ տղամարդկանց չի կարելի մթերքներ գնել հանգստյան օրերին: Այս մասին հայտնում է The Local-ը:

Պարբերականը նշում է, որ առևտրի կետը պատկանում է նեոֆիտների (մուսուլմանների, որոնք վերջերս են սկսել իսլամ դավանել), և նրանք այդպիսի միջոցի են դիմել, որպեսզի տարբեր սեռերի մարդիկ չհանդիպեն խանութում:

Մթերային խանութի տերերի որոշումն առաջացրել է քաղաքային իշխանությունների դժգոհությունը: Բորդոյի քաղաքապետ Ալեն Ժյուպպեն իր թվիթերյան էջում կոչ է արել «վերջ դնել այդ խտրականությանը»:

«Կյանքում առաջին անգամ Բորդոյում նման բան է լինում: Դա վատ է, քանի որ մուսուլմանական համայնքի ոչ ճիշտ իմիջ է ստեղծում, որն 99% դեպքերում հետևում է ֆրանսիական բոլոր օրենքներին»,- հայտարարել է քաղաքապետի տեղակալ Մարիկ Ֆետուն՝ նշելով, որ խտրականության դեպքերի համար կարելի է պատժվել մինչև 5 տարվա ազատազրկմամբ կամ 75 000 եվրո տուգանքով:

Պարբերականը նշում է, որ առայժմ պարզ չէ՝ իրենց արգելքով ինչ օրենք են խախտում խանութի տերերը:

Մուսուլմանական շատ երկրներում, մասնավորապես` Սաուդյան Արաբիայում, տղամարդկանց և կանանց թույլատրված է խանութներ, առևտրի կենտրոններ, սրճարաններ և ռեստորաններ գնալ միայն ընտանիքի այլ սեռի անդամների ուղեկցությամբ: Այդ կանոնն օտարերկրացիների վրա չի տարածվում: