Ամերիկացիների ավելի քան երկու երրորդը տառապում Է ավելորդ քաշից. բժիշկներ

Միացյալ Նահանգների տարածքում այսօր բնակվող կանանց 60 տոկոսից ավելին եւ տղամարդկանց 75 տոկոսը տառապում են ճարպակալումից կամ ավելորդ քաշի տարբեր ձեւերից: Այդ մասին, ինչպես տեղեկացնում Է «Արմենպրես»-ը, գրել են բժիշկներն այն հոդվածում, որը հրապարակվել Է JAMA Internal Medicine հանդեսում:

«Ճարպակալումը եւ ավելորդ քաշը կապված են առողջության բազմաթիվ քրոնիկ խնդիրների հետ, ներառյալ հիպերտոնիան, սրտի հիվանդությունները, երկրորդ տիպի շաքարախտը, օստեոարտրիտը եւ քաղցկեղի որոշ տեսակները: Մենք պետք Է համակարգված ջանքեր գործադրենք, որպեսզի կանգնեցնենք այդ միտումը, որը կրճատում Է այդքան մեծ թվով մարդկանց կյանքը»,- հայտարարել Է Լին Յանը Վաշինգտոնի Սենտ Լուիսի համալսարանից, որի խոսքը մեջբերում Է Live Science հրատարակությունը:

Յանը եւ նրա գործընկերներն այս եզրակացությանն են հանգել՝ վերլուծելով այն վիճակագրությունը, որն ազգային առողջապահական եւ սոցիալական ծառայությունները 2007-ից մինչեւ 2012 թվականը հավաքել են NHANES ծրագրի շրջանակներում: Դրան մասնակցել են բոլոր ազգությունների եւ ռասաների ավելի քան 15 հազար ամերիկացիներ՝ կրթության եւ տնտեսական եկամուտների ամենատարբեր մակարդակներով:

NHANES-ի տվյալների վերլուծությունը չափազանց տխուր պատկեր Է ցույց տվել. ամերիկացիների գրեթե 40 տոկոսը եւ ամերիկուհիների 30 տոկոսը տառապել են ավելորդ կիլոգրամներից, եւ լրացուցիչ՝ տղամարդկանց 35 տոկոսը եւ կանանց 37 տոկոսը տառապել են ճարպակալումից: Ընդհանուր առմամբ՝ ամերիկուհիների շուրջ երկու երրորդը եւ ամերիկացիների երեք քառորդը եղել են ճարպի ավելորդ գրամների եւ կիլոգրամների կրողներ:

Ինչպես ընդգծում են գիտնականները, ընդամենը 10 – 20 տարի առաջ նվազ տագնապալի պատկեր Էր դիտվում. տղամարդկանց «սոսկ» 63 տոկոսը եւ կանանց մոտավորապես կեսն Էին տառապում ճարպակալումից եւ ավելորդ կիլոգրամներից: Դա վկայում Է այն մասին, որ Միացյալ Նահանգներում ճարպակալման համաճարակի մասշտաբները շարունակում են աճել, երակացնում են գիտնականները, հաղորդել Է ՌԻԱ Նովոստին: