Նոր շրջադարձ Լեյլա և Արիֆ Յունուսների դատական գործում

Ադրբեջանում ձերբակալված իրավապաշտպաններ Լեյլա և Արիֆ Յունուս ամուսինների դեմ բացված քրեական գործից «պետական դավաճանության» մեջ մեղադրանքն առաձին վարույթ է հանվել:

Այս մասին, ինչպես հաղորդում է «Արմենպրես»-ը, «Թուրան»-ին հայտնել է Լ.Յունուսի փաստաբան Էլչին Ղամբարովը: Նրա խոսքով' նախնական հետաքննությունն ավարտվում է և մոտ ժամանակում գործը կուղարկվի դատարան, որը պետք է քննի միայն տնտեսական հոդվածներով մեղադրանքները:

Ինչ վերաբերում է «պետական դավաճանության» հոդվածով մեղադրանքին, ապա Քրեադատավարական օրենսգրքի համաձայն, դրա վերաբերյալ հետաքննությունը կարող է դադարեցվել կամ էլ հետաքննվել առանձին: Այդ մասին որոշումը պետք է ընդունվի քննչական մարմնի կողմից:

Փաստաբանը պետական դավաճանության մեջ մեղադրանքի' առանձին վարույթ հանելը Յունուս ամուսինների գործում «լավ հեռանկար» է անվանել:

Լեյլա Յունուսը և նրա ամուսին Արիֆ Յունուսը «պետական դավաճանության» մեջ մեղադրվում են, իբր, Հայաստանի օգտին լրտեսություն կատարելու համար, սակայն, նրանց հետապնդելու իրական պատճառն Ադրբեջանում առկա 98 քաղաքական բանտարկյալների խնդրի ակտուալացումն է և միջազգային կազմակերպություններին արված' Բաքվում անցկացվելիք Եվրոպական խաղերը բոյկոտելու մասին կոչերը:

Միջազգային հանրությունը Յունուս ամուսիններին քաղաքական բանտարկյալներ, Amnesty International կազմակերպությունը' «խղճի բանտարկյալներ» են ճանաչել և կոչ արել ազատ արձակել նրանց: