ԱՄՆ-ը և ՉԺՀ-ն պայմանավորվել են զարգացնել համագործակցությունը զինվորականների մակարդակով

ԱՄՆ-ի և Չինաստանի իշխանությունները պայմանավորվել են զարգացնել համագործակցությունը զինվորականների մակարդակով, ինչպես նաև հանդես են եկել Իրանի միջուկային ծրագրի շուրջ «համապարփակ լուծում» գտնելու օգտին: Այդ մասին, ինչպես տեղեկացնում է «Արմենպրես»-ը, հունիսի 24-ին հաղորդել է Սպիտակ տունը՝ ամփոփելով ԱՄՆ-ի նախագահի ազգային անվտանգության հարցերով խորհրդական Սյուզան Ռայսի և ՉԺՀ-ի Պետխորհրդի անդամ Յան Ցզեչիի հանդիպման արդյունքները:

Ինչպես նշվում է հաղորդագրության մեջ, կողմերը «համաձայնել են, որ անհրաժեշտ է զարգացնել համագործակցությունը զինվորականների մակարդակով, իրավապահ մարմինների միջև և ժողովրդական դիվանագիտության եղանակով»: Նրանք «նաև քննարկել են տարածաշրջանային և միջազգային հարցեր», մասնավորապես, առողջապահությունը, կլիման և մաքուր էներգետիկան, միջուկային զենքի չտարածումը:

Բանակցությունների ընթացքում կողմերն «ընդգծել են, որ պաշտպանում են Կորեական թերակղզու լիակատար միջուկազերծումը», ինչպես նաև «կոչ են արել՝ շարունակել առաջընթացը՝ «հինգ գումարած մեկ» խմբի բանակցություններում երկարաժամկետ համապարփակ լուծման հասնելու նպատակով, որը կերաշխավորի Իրանի միջուկային ծրագրի բացառապես խաղաղ բնույթը»:

Բացի այդ, բանակցություններում արծարծվել են «անվտանգությունը ծովում և կիբերանվտանգությունը»: Ինչպես նշվում է, «Ռայսը կոչ է արել Չինաստանին՝ կոնկրետ քայլեր ձեռնարկել այդ ուղղությամբ»:

Կողմերը նաև քննարկել են ՉԺՀ-ի նախագահ Սի Ցզինպինի՝ սեպտեմբերին ԱՄՆ կատարելիք պետական այցը, հաղորդել է ՌԻԱ Նովոստին: