Թբիլիսիում հեղեղումից տուժածները դժգոհություն են հայտնել իշխանությունների առաջարկած փոխատուցման չափից

Թբիլիսիի կենտրոնի Սվանիձեի փողոցի բնակիչները, որոնք ամենից ավելի են տուժել հունիսի լույս 14-ի գիշերը Վրաստանի մայրաքաղաքում տեղի ունեցած ավերիչ հեղեղման ժամանակ, դժգոհ են պետության կողմից առաջարկված փոխհատուցումից և ստեղծել են իրենց իրավունքների պաշտպանության կոմիտե, տեղեկացնում է «Արմենպրես»-ը:

Ինչպես հաղորդել են Վրաստանի զանգվածային լրատվամիջոցները, տուժածների շահերն անհատույց կերպով մտադիր են պաշտպանել «Արդարադատության տուն» ընկերության իրավաբանները:

Ընկերության տնօրեն Բեժան Բեժուաշվիլիի խոսքով՝ Սվանիձեի փողոցի բնակիչների հետ հանդիպել է հարկադիր տարագրյալ անձանց, գաղթականների և տարաբնակեցման գործերի նախարար Սոզար Սուբարին, որը նրանց հայտնել է, որ պետությունը 20 հազարական լարի (ընթացիկ փոխարժեքով շուրջ 8,9 հազար դոլար) կտրամադրի յուրաքանչյուր տուժած ընտանիքի: Ըստ որում՝ նախարարը նշել է, որ ժամանակին նույնքան գումար են ստացել էկոմիգրանտները լեռնային Աջարիայում, և նրանց բավարարել է այդ փողը:

«Մեղմ ասած՝ Սուբարին կտրված է իրականությունից: Լեչխումի (Ռաչա Լեչխումիի տարածաշրջան) և Խուլոյի (Աջարիայի Ինքնավար Հանրապետություն) շրջանում տները և այն տները, որոնք գտնվում են մայրաքաղաքի կենտրոնում չեն կարող նույն արժեքն ունենալ: Ո՞վ է որոշել, թե 20 հազարը բավական է ավերված տների վերականգնման համար: Իշխանության ներկայացուցչի այս առաջարկությունը, բնականաբար, բողոք է հարուցել»,- ասել է Բեժուաշվիլին:

Թբիլիսիում տարերային աղետի հետևանքով զոհվել է 19 մարդ, երեք հոգի համարվում է անհայտ կորած: Տասնյակ ընտանիքներ մնացել են անօթևան, ջրով են հեղեղվել բնակելի տներ, վնասվել են ճանապարհներ և քաղաքի այլ ենթակառուցվածքներ: Առողջապահության նախարարությունը հաշվառման է վերցրել 106 տուժած ընտանիքներ՝ ընդամենը 457 մարդու: Տարերքի հարվածից տուժել է կենդանաբանական այգին, որտեղ կենդանիների կեսը սատկել է:

Նախնական տվյալներով՝ ավերիչ հեղեղման հասցրած վնասը կազմում է ավելի քան 100 միլիոն լարի (45 միլիոն դոլար), հաղորդել է «Ինտերֆաքս»-ը: