Ֆրանսիայում ահաբեկչական գործողության կասկածյալը քրեական անցյալ չի ունեցել. ՆԳՆ

Ֆրանսիայի Իզերի դեպարտամենտում արդյունաբերական ձեռնարկության վրա հարձակման կասկածանքով ձերբակալվածը քրեական անցյալ չի ունեցել, բայց ոստիկանության հսկողության տակ է գտնվել արմատական տրամադրությունների պատճառով: Այդ մասին, ինչպես տեղեկացնում է «Արմենպրես»-ը, հայտարարել է Ֆրանսիայի ներքին գործերի նախարար Բեռնար Կազնյովը, որը ժամանել է ահաբեկչական գործողության վայր:

«Ձերբակալվածի ինքնությունը մինչ այժմ պարզվում է: Մենք հիմքեր ունենք կարծելու, որ դա Յասին Սալին է: Նա արդեն 2006 թվականին հսկման օբյեկտ է եղել արմատական տրամադրությունների համար, բայց քրեական անցյալ չունի»,- ասել է ՆԳ նախարարության ղեկավարը: Նրա ելույթը հեռարձակել է BFMTV հեռուստաալիքը:

Կազնյովի խոսքով՝ ձերբակալվածը 2008 թվականից հետո հսկման օբյեկտ չէր: Նա ոստիկանությանը հայտնի է եղել սալաֆիտների շարժման հետ կապերի համար:

Հունիսի 26-ի առավոտյան ավտոմոբիլով տղամարդ է ներխուժել այն ձեռնարկության տարածք, որտեղ արտադրվում և լցվում են գազի բալոններ: Ավտոմոբիլը պայթել է դրսում շարված լիքն անոթների վրա: Հարձակման հետևանքով մեկ մարդ է զոհվել, ևս առնվազն երկուսը՝ վիրավորվել: Ձեռնարկության տարածքից տարահանվել է 40 մարդ: Պատահարի վայրի մոտ հայտնաբերվել են իսլամիստական դրոշ և մարդու գլուխ՝ պոկված մի քանի տասնյակ մետր հեռավորությամբ գտնվող մարմնից, հաղորդել է ՌԻԱ Նովոստին: