Վրաստանի նախագահի մարդկային արարքն ամենաքննարկվող իրադարձությունն է սոցցանցերի վրացի օգտատերերի շրջանում

Վրաստանի նախագահ Գիորգի  Մարգվելաշվիլիի արարքի մասին Ֆեյսբուքի վրացական տիրույթում շատ է խոսվում: Ինչպես փոխանցում է «Գրուզիա օնլայնը», նախագահի մեքենայի անցնելու ժամանակ մի ծեր կին սայթաքել ու ընկել է: Շարասյունը կանգնել է, նախագահը դուրս է եկել մեքենայից, նրան օգնել է կանգնել, նստեցրել տաքսի, վճարել, որից հետո միայն շարուանակել ճանապարհը: 

«Առավոտյան աշխատանքի գնալիս շատ հետաքրքիր բանի ականատես եղա: Կարելի է ասել՝ վրացի քաղաքական գործիչներին ոչ բնորոշ արարք, անսպասելի և զարմանալի վրացիների համար: Մի խոսքով՝ անցնում էի Թաբիձե կամրջով և մյուս կողմում տեսա, որ բավականին տարեց միկին սայթաքելով ընկավ: Այդ պահին նրա կողքին ոչ ոք չկար: Ես նույնպես հեռու էի և այդ պահին ուղղվեցի նրա կողմ: Մինչ կանցնեի Թաբիձե կամրջով, անսպասելիորեն նրա առաջ կանգնեցին երկու «Տոյոտա», և բառի բուն իմաստով դրանից դուրս թռավ նախագահ Գիորգի Մարգվելաշվիլին, օգնեց կնոջը կանգնել, խոսեց նրա հետ, հետո տաքսի նստեցրեց, վճարեց և արագ վերադարձավ մեքենայի մոտ: Ոչ միայն չհասցրի կամուրջն անցնել, այլև նույնիսկ ուշքի գալ»,- գրել է ականատեսներից մեկը՝ Ուչա Դարախվելիձեն: 

Ականատեսներից ևս մեկը այս փաստի հետ կապված լուսանկար է հրապարակել դեպքի վայրից: Լուսանկարում երևում է կառավարական երկու մեքենա: Ինչպես նշել է ականատեսը, ամեն ինչ կատարվել է այնպես արագ, որ նախագահին նկարահանել չի հաջողվել: 

Այս փաստն արժանացել է վրացի օգտատատերերի մեծամասնության հավանությանը: Շատերը գրում են, որ հպարտանում են իրենց նախագահի արարքով: