ԱՄՆ-ն և Ֆրանսիան Աթենքին կոչ են արել փոխզիջում գտնելու վարկատուների հետ

ԱՄՆ-ի և Ֆրանսիայի նախագահներ Բարաք Օբաման և Ֆրանսուա Օլանդը հեռախոսազրույցի ընթացքում Հունաստանին և նրա վարկատուներին փոխզիջում գտնելու կոչ են արել: Ինչպես տեղեկացնում է «Արմենպրես»-ը, հուլիսի 7-ին այս մասին հաղորդել է ՏԱՍՍ-ը՝ վկայակոչելով Սպիտակ տունը:

«Երկու երկրների ղեկավարները համաձայնվել են (ճգնաժամից) դուրս գալու որոնման անհրաժեշտությանը, ինչը Հունաստանին թույլ կտա վերադառնալ բարենորոգումներին և վերականգնել աճը և պարտքի՝ եվրոգոտու համար ընդունելի մակարդակը»,- ասված է Օբամայի վարչակազմի հայտարարության մեջ:

Իր հերթին, ԱՄՆ-ի ֆինանսների նախարար Ջեյկոբ Լյուն հուլիսի 6-ին բանակցություններ է վարել Հունաստանի վարչապետ Ալեքսիս Ցիպրասի և այդ երկրի ֆինանսների նախարարության նոր ղեկավար Էվկլիդիս Ցոկալոտոսի հետ, հաղորդել է Reuters-ը: Լյուն Աթենքին կոչ է արել վերսկսելու բանակցությունները վարկատուների հետ՝ հույս հայտնելով, որ համաձայնությունը «Հունաստանին թույլ կտա իրականացնել դժվարին, բայց անհրաժեշտ ֆինանսական և կառուցվածքային բարենորոգումները»:

Հուլիսի 6-ին Փարիզում Ֆրանսիայի նախագահ Ֆրանսուա Օլանդը և Գերմանիայի կանցլեր Անգելա Մերկելը Հունաստանի կառավարությանը կոչ են արել եվրոգոտու երկրների՝ հուլիսի 7-ի գագաթնաժողովի համար պատրաստելու պարտային հիմնախնդրի լուծման «իրական առաջարկություններ»: Նրանք ընդգծել են, որ վարկատուների հետ բանակցությունների համար դուռը մնում է բաց: