Սիլվիո Բեռլուսկոնին դատապարտվել է երեք տարվա ազատազրկման` սենատորներին կաշառք տալու համար

Իտալիայի նախկին վարչապետ և «Միլան» ֆուտբոլային ակումբի սեփականատեր Սիլվիո Բեռլուսկոնին դատապարտվել է երեք տարվա ազատազրկման: Այս որոշումը կայացվել է Նեապոլի դատարանի կողմից, որը քաղաքական գործչին մեղավոր է ճանաչել 2007 թվականին սենատորներին կաշառելու մեջ՝ կառավարությանը՝ իր մրցակից Ռոմանո Պրոդիի գլխավորությամբ տապալելու նպատակով: Այս մասին տեղեկացնում է LifeNews-ը:

Ըստ տեղական ԶԼՄ-ների՝ դատախազությունը պահանջել է հինգ տարվա ազատազրկման դատապարտել նախկին վարչապետին:

Բեռլուսկոնիի հետ միասին տվյալ գործով մեղավոր է ճանաչվել իտալացի գործարար, L'Avanti! թերթի նախկին հրատարակիչ Վալտեր Լավիտոլան: Ըստ քննության վարկածի՝ Լավիտոլան միջնորդությամբ է հանդես եկել, և Բեռլուսկոնիի կողմից 3 մլն եվրո է փոխանցել սենատոր Սերխիո Դե Գրեգորիոին: Գործարարը ստացել է նաև երեք տարվա ազատազրկում, թեև մեղադրող կողմը պահանջում էր 4,4 տարվա ազատազրկում:

Դատավարությունն ընդդեմ Բեռլուսկոնիի և Լավիտոլայի սկսվել է 2014 թ. փետրվարին Նեապոլում: Համաձայն մեղադրող կողմի՝ 2007թ. քաղաքական գործիչը, ով եղել է ընդդիմության մեջ, վատնել է մի քանի միլիոն եվրո՝ իշխող մեծամասնությունից մի շարք սենատորներին կաշառելու համար, ովքեր նրա կողմն են անցել: Դրա շնորհիվ Բեռլուսկոնին հրահրել է կառավարության ճգնաժամը, որի արդյունքում վարչապետ Ռոմանո Պրոդին 2008 թվականի հունվարին հրաժարական է տվել: