Ճապոնիայում շոգի պատճառով չորս մարդ է զոհվել, հազարավորները հոսպիտալացվել են

Ճապոնիայի տարածքի մեծ մասում հաստատված շոգի պատճառով չորս մարդ զոհվել, ավելի քան երեք հազարը ջերմահարվածներով հոսպիտալացվել է: Ճապոնիայի հրշեջ պահպանության վարչությունը, որի տնօրինության տակ է գտնվում շտապ օգնության ծառայությունը, հայտնել է հուլիսի 6-ից մինչև 12-ն ընկած ժամանակահատվածի տվյալները, տեղեկացնում է «Արմենպրես»-ը:

Առավել շատ թվով տուժաներ են նշվել Սայտամայի պրեֆեկտուրայում. այստեղ հոսպիտալացվել է 190 մարդ, Օսակայում՝ 185, Կումամոտոյում՝ 172 հոգի, Տոկիոյում՝ 162 և Աիտիում՝ 161 մարդ:

Անցյալ շաբաթ շոգի գագաթնակետը բաժին է ընկել կիրակի-երկուշաբթի օրան: Ընդամենը մեկ օրում շոգի պատճառով այստեղ զոհվել է չորս մարդ, ավելի քան 800-ը հոսպիտալացվել է: Մի շարք պրեֆեկտուրաներում օդը շիկացել է մինչև 38,4 աստիճան: Ջերմաչափի սյունը 35 աստիճանի նշագծից վեր է բարձրացել օդերևութաբանական դիտարկումների 928 կետերից 120-ում, իսկ 30 աստիճանից բարձր՝ 500 կետերում:

Ջերմաստիճանի բարձրացման պատճառով օդերևութաբանները մարդկանց կոչ են անում օգտվել օդորակիչներից, ջանալ երկար ժամանակ չգտնվել դրսում, ինչպես նաև մշտապես ջուր խմել, հաղորդել է ՌԻԱ Նովոստին: