Իսպանական Պուենտե Խենիլ քաղաքում խաչքար է կանգնեցվել

Իսպանիայի Պուենտե Խենիլ (Կորդոբա) քաղաքում hուլիսի 9-ին խաչքար է կանգնեցվել՝ նվիրված հայ և իսպանացի ժողովուրդների բարեկամությանը: Ինչպես «Արմենպրես»-ին տեղեկացրին ՀՀ արտաքին գործերի նախարարության մամուլի, տեղեկատվության եւ հասարակայնության հետ կապի վարչությունից, արարողությանը մասնակցել են Իսպանիայում ՀՀ դեսպան Ավետ Ադոնցը, Պուենտե Խենիլի քաղաքապետ Էստեբան Մորալես Սանչեսը, Իսպանիայում և Պորտուգալիայում հայրապետական պատվիրակի ընդհանուր փոխանորդ Հայր Սասունը և հայ համայնքի անդամներ։ Խաչքարը տեղադրվել է իսպանական քաղաքի կենտրոնական «Parque de los Pinos» զբոսայգում:

Դեսպան Ադոնցն իր ողջույնի խոսքում անդրադարձել է հայ-իսպանական հարաբերությունների պատմությանը, ներկային, կարևորել խաչքարի տեղադրումը հատկապես այս տարի՝ Հայոց ցեղասպանության 100-րդ տարելիցին, շնորհակալություն հայտնել քաղաքապետին և մտահաղացման հեղինակներին' կատարած աշխատանքի համար:

Քաղաքապետ Էստեբան Մորալես Սանչեսն, իր հերթին, իր երախտիքն է հայտնել Պուենտե Խենիլի հայ համայնքին՝ օրինակելի քաղաքացիներ լինելու, քաղաքի բազմամշակույթ ներկապնակն իրենց ներկայությամբ, աշխատասիրությամբ հարստացնելու համար:

Իսպանիայում և Պորտուգալիայում հայրապետական պատվիրակի ընդհանուր փոխանորդ Հայր Սասունի կողմից խաչքարն օրհնելուց հետո տեղի է ունեցել տեղում գործող հայկական պարախմբի ելույթ-համերգը: