ՄԱԿ-ի Անվտանգության խորհուրդն Իրանի վերաբերյալ բանաձևի քննարկումը նշանակել է հուլիսի 20-ին

ՄԱԿ-ի Անվտանգության խորհուրդն (ԱԽ) Իրանի միջուկային ծրագրի համաձայնագրի պաշտպանության բանաձևի նախագծի շուրջ կքվեարկի հուլիսի 20-ին՝ Նյու Յորքի ժամանակով 09:00-ին (Երևանի ժամանակով 17:00-ին): Սա հուլիսի 16-ի երեկոյան հավաստել են Նոր Զելանդիայի մշտական ներկայացուցչությունում, որն այս ամսին նախագահում է Միավորված ազգերի Անվտանգության խորհրդում, տեղեկացնում է «Արմենպրես»-ը:

«Իրանի շուրջը գործողությունների համապարփակ համատեղ պլանին վերաբերող բանաձևի ընդունումը պլանավորված է հուլիսի 20-ին առավոտյան ժամը 9-ին»,- լրագրողներին հաղորդել է Նոր Զելանդիայի ներկայացուցչության մամուլի քարտուղար Նիկոլա Գարվին: Եթե ոչ մի պատվիրակություն չհայտնի իր ցանկությունները, փաստաթուղթը կընդունվի առանց փոփոխությունների:

Ավելի վաղ մի դիվանագիտական աղբյուր ՏԱՍՍ-ին հաղորդել է, որ Անվտանգության խորհրդի անդամների փորձագետների՝ հուլիսի 16-ին կայացած հանդիպմանը երկրներից ոչ մեկը բանաձևի ուղղումներ չի առաջարկել: «Փաստաթուղթը պատրաստ է: Այն համաձայնեցված է, և այնտեղ ոչ մի փոփոխություններ չեն կատարվել»,- նշել է նա: