Իրանի հետ համաձայնագիրն աշխարհը զերծ կպահի Իրանի կողմից միջուկային զենքի ստեղծումից. Ենս Ստոլտենբերգ

Իրանի միջուկային ծրագրի շուրջը համաձայնագիրը, որը ձեռք բերվեց Իրանի և «վեցյակի» (ՄԱԿ-ի ԱԽ-ի հինգ մշատական անդամներ և Գերմանիա) բանակցություններում և հուլիսի 20-ին հավանության արժանացավ ՄԱԿ-ի Անվտանգության խորհրդի (ԱԽ) բանաձևով, լավագույն միջոցն է այն բանի համար, որպեսզի թույլ չտրվի, որ Իսլամական Հանրապետությունում միջուկային զենք հայտնվի: Ինչպես տեղեկացնում է «Արմենպրես»-ը, Մեծ Բրիտանիայի BBC հեռուստառադիոհաղորդումների կորպորացիային տված հարցազրույցի ժամանակ այս կարծիքն է հայտնել ՆԱՏՕ-ի գլխավոր քարտուղար Ենս Ստոլտենբերգը:

«Այդ գործարքն ամենալավ հնարավոր միջոցն է, որը մենք ունենք, որպեսզի թույլ չտանք, որ Իրանում միջուկային զենք հայտնվի: Դա կարևոր է մեզ բոլորիս համար, ՆԱՏՕ-ի բոլոր դաշնակիցների համար»,- ասել է նա: «Ես ողջունում եմ գործարքը և այն համարում են կարևոր, որովհետև այլընտրանքը կլիներ պարզապես հետևել Իրանում այն իրադրության զարգացմանը, թե նա ինչպես է ավելի ու ավելի մոտենում այն բանին, որպեսզի ատոմային ռումբ կամ միջուկային զենք ստեղծի»,- հավելել է Հյուսիսատլանտյան դաշինքի գլխավոր քարտուղարը:

ՄԱԿ-ի Անվտանգության խորհրդի անդամների կողմից հուլիսի 20-ին միաձայն ընդունված բանաձևին համապատասխան՝ Իրանի նկատմամբ բոլոր միջազգային պատժամիջոցները 10 տարի հետո չեղյալ կհայտարարվեն՝ պայմանով, որ երկրի իշխանությունները սկսեն կատարել ընթացիկ տարվա հունիս-հուլիսին Վիեննայում կայացած երկարատև բանակցությոնների արդյունքներով «վեցյակի» հետ ձեռք բերված համաձայնությունները, հաղորդել է ՏԱՍՍ-ը: