Իրանը շուրջ 12 միլիարդ դոլար է ստացել Ժնևում ատոմի շուրջը ձեռք բերված համաձայնությունից հետո

Թեհրանը 2013 թվականին Ժնևի ժամանակավոր համաձայնագրի ստորագրումից հետո շուրջ 12 միլիարդ դոլար է ստացել պատժամիջոցների մեղմացման շնորհիվ, հաղորդել է Sputnik գործակալությունը՝ վկայակոչելով Իրանի կառավարության մամուլի քարտուղարին, տեղեկացնում է «Արմենպրես»-ը: ՝

Թեհրանը և «վեցյակի» արտաքին գործերի նախարարությունների ղեկավարները 2013 թվականի նոյեմբերի 24-ին Ժնևում հասել են նախնական համաձայնության, ըստ որի Իրանը կկրճատի աշխատանքները միջուկային ծրագրի շրջանակներում, միջազգային փորձագետներին կտրամադրի հնարավորություն ավելի հանգամանալից ստուգումների համար, իսկ երկրի նկատմամբ տնտեսական պատժամիջոցները կթուլացվեն:

«Ժնևում ժամանակավոր համաձայնության հասնելուց հետո Թեհրանը 22 ամսվա ընթացքում ստացել է շուրջ 12 միլիարդ դոլար և ոսկու որոշ ակտիվներ»,- հուլիսի 21-ին հայտարարել է Իրանի կառավարության մամուլի քարտուղար Մոհամեդ Բագեր Նոբախտը մամուլի ասուլիսի ժամանակ, որը հեռարձակել է Իրանի «Ալ Ալամ» հեռուստաալիքը:

Ավելի վաղ հաղորդվել է, որ «վեցյակի» հետ համաձայնագրի հաջող կատարման դեպքում Իրանը կունենա ավելի քան 100 միլիարդ դոլար ստանալու հնարավորություն ավելի վաղ սառեցված հաշիվներից, հաղորդել է ՌԻԱ Նովոստին: