Խադիջա Իսմայիլովան պարգևատրվել է «Մամուլի ազատություն» պարգևով

Ադրբեջանում ձերբակալված լրագրող Խադիջա Իսմայիլովան, ինչպես նաև ամերիկացի լրագրողներ Ջեյսոն Ռեզաիանը և Օսթին Թայսը, որոնք ձերբակալվել են Սիրիայում և Իրանում, արժանացել են ԱՄՆ-ի Ազգային մամուլի ակումբի Մամուլի ազատության պարգևին:

Ինչպես հաղորդում է «Արմենպրես»-ը' վկայակոչելով «Թուրան»-ը, պարգևատրման արարողությունն օրերս տեղի է ունեցել Վաշինգտոնում:

«Մենք չենք դադարեցնի այդ լրագրողների համար պայքարը, մինչև նրանք չազատվեն բանտից և չվերականգնեն իրենց գործունեությունը»,- ասել է ԱՄՆ-ի Ազգային մամուլի ակումբի նախագահ Ջոն Հյուզը:

Պարգևատրման ամենամյա արարողությանը մասնակցել են տարբեր ԶԼՄ-ների լրագրողներ և ղեկավարներ: Նրանք տոնել են մամուլի ազատության ոլորտում ամենահեղինակավոր պարգևներից մեկի հանձնումը և աջակցություն հայտնել բանտերում գտնվող իրենց գործընկերներին:

Խադիջա Իսմայիլովային այդ պարգևին ներկայացրել է «Ազատություն» ռադիոկայանի ղեկավար Նենադ Պեժիչը:

«Այդ պարգևը Խադիջայի արիության ցուցանիշն է, ինչպես նաև մարտահրավեր մեր բոլորի համար, որ դատապարտենք նրա ձերբակալությունը և պահանջենք նրա ազատումը»,- ասել է Պեժիչը:

Խադիջա Իսմայիլովայի նկատմամբ սկզբում «ինքնասպանության հասցնելու» մեղադրանք, իսկ հետո «խոշոր չափերի յուրացման և զեղծարարության», «ապօրինի ձեռնարկատիրության», «հարկերի վճարումից խուսափելու», «պաշտոնեական լիազորությունները չարաշահելու» կեղծ մեղադրանքներ են առաջադրվել:

Խադիջա Իսմայիլովան Ադրբեջանում ձերբակալվել է 2014 թվականի դեկտեմբերի 5-ին՝ նախկին գործընկերոջն ինքնասպանության հասցնելու շինծու մեղադրանքով:

Նա Ադրբեջանի իշխանությունների թիրախն է դարձել իր լրագրողական գործունեության համար: Իսմայիլովան Ադրբեջանում իշխանության վերին էշելոններում կոռուպցիոն փաստերի լրագրողական հետաքննությունների հեղինակ է, որոնց արդյունքում բացահայտվել է նաև Ադրբեջանի նախագահ Իլհամ Ալիևի և նրա ընտանիքի օֆշորյան գոտիներում ունեցած հարյուրավոր միլիոն դոլարների հասնող ունեցվածքը: Վերջին տարիներին նա թոք-շոու էր վարում «Ազատություն» ռադիոկայանի ադրբեջանական ծառայությունում:

Ադրբեջանական Meydan TV հեռուստաալիքն ապրիլի 16-ին հայտնել էր, որ Խադիջա Իսմայիլովան արժանացել է միջազգային «PEN/Barbara Goldsmith գրելու ազատություն» պարգևին, որը նրա ներկայացուցչին հանձնվել է այս տարվա մայիսի 5-ին Նյու Յորքում' ԱՄՆ բնության պատմության թանգարանում: