Հիլարի Քլինթոնը թողարկել է նախագահական մրցարշավում առաջին տեսահոլովակը

Հիլարի Քլինթոնը հայտարարել է, որ նախագահական արշավի մեջ է մտել հանուն այն կանանց, ովքեր պայքարում են իրենց ընտանիքների երջանկության համար. առաջին տեսահոլովակում, որը հայտնվել է արշավի շրջանակներում, Քլինթոնը պատմել է իր մոր դժվարին և դժբախտ մանկության մասին, տեղեկացնում է «Արմենպրես»-ը:

Մեկրոպեանոց տեսահոլովակը ցուցադրում է Դորոթի Ռոդեմի մանկական և պատանեկան լուսանկարներից մի քանիսը, որոնց ֆոնին Քլինթոնն անում է իր պատմությունը: «8 տարեկանում ծնողները լքել են նրան՝ Չիկագոյից ուղարկելով Լոս Անջելես՝ տատիկի և պապիկի մոտ, որոնք դա չէին ցանկանում»,- պատմում է Քլինթոնը:

«14 տարեկանում նա սկսել է աշխատել ինչ-որ մեկի տանը և առաջին անգամ տեսել է ծնողների, որոնք սիրում էին իրենց երեխաներին և հոգ տանում նրանց մասին: Եվ նա նման սիրող ընտանիք է ստեղծել մեզ համար»,- պատմում է ԱՄՆ-ի նախագահության թեկնածուն: «Ես մտածում եմ յուրաքանչյուր Դորոթիի մասին ամբողջ Ամերիկայում, որոնք պայքարում են հանուն իրենց ընտանիքների և տեղի չեն տալիս»,- ասում է Քլինթոնը:

Ինչպես նշվում է, տեսահոլովակն Այովայի և Նյու Հեմփշիրի նահանգներում հեռուստաէկրաններին կհայտնվի օգոստոսի 4-ին:

Ներկայումս Հիլարի Քլինթոնն առավել մեծ ժողովրդականություն վայելող թեկնածուն է Դեմոկրատական կուսակցությունից, նա զգալիորեն առաջ է անցել ամենամոտ մրցակցից՝ Բեռնի Սանդերսից: Սակայն բարձրագույն պաշտոնի համար իր թեկնածությունը կարող է առաջադրել նաև ԱՄՆ-ի փոխնախագահ Ջո Բայդենը: Սպասվում է, որ նա իր որոշման մասին կհայտարարի մինչև ամռան վերջը, հաղորդել է ՌԻԱ Նովոստին: