Եմենի իշխանամետ ուժերը շիաներից ազատագրել են Լահջ նահանգը

Եմենի իշխանամետ ուժերը, որոնք նախագահ Աբդ Ռաբբո Մանսուր ալ Հադիի կողմնակիցներն են, շիական «Անսար Ալլահ» շարժման անդամներից ազատագրել են Լահջ նահանգը, որը գտնվում է երկրի հարավում: Ինչպես հաղորդում է «Արմենպրես»-ը, վկայակոչելով արաբական լրատվամիջոցները, ռազմական ղեկավարությունը տեղեկացրել է, որ իշխանամետ ուժերը Լահջ նահանգը մաքրել են շիաներից: Նահանգը գտնվում է Եմենի հարավում, և այն երկրորդն է Ադենից հետո, որն ազատագրվել է շիաներից:

Եմենի հարցով ՄԱԿ-ի հատուկ բանագանց Իսմայիլ ուլդ Շեյխ Ահմադը Կահիրեում ավարտել է խորհրդակցությունները և շարունակել իր այցելությունները Օման և Սաուդյան Արաբիա՝ կարգավորելու եմենյան հակամարտությունը: Եգիպտոսում նա հանդիպել է Արաբական երկրների լիգայի գլխավոր քարտուղար Նաբիլ ալ Արբաիի և այլ պաշտոնյաների հետ:

ԱՄՆ-ի նախագահ Բարաք Օբաման և ՄԱԿ-ի գլխավոր քարտուղար Պան Կի Մունը Եմենի հարցը քննարկելու ժամանակ հաստատել են, որ խնդիրը պետք է լուծվի միայն երկխոսության միջոցով: Պան Կի Մունը տեղեկացրել է, որ այժմ Եմենի բնակչության 80 տոկոսը՝ ավելի քան 21 միլիոն մարդ, մարդասիրական օգնության կարիք ունի:

Եմենում իրավիճակն առավել սրվել էր 2015թ. հունվարից, երբ շիա ապստամբները գրավել էին մայրաքաղաք Սանան: Ապստամբների ճնշման տակ նախագահ Աբդ Ռաբբո Մանսուր ալ Հադին և վարչապետ Խալեդ Բախախը հրաժարական էին տվել: Որոշ ժամանակ անց նախագահ Մանսուր Հադին ստիպված փախուստի էր դիմել Ադեն, իսկ կարճ ժամանակ հետո՝ մարտի 25-ին շիաների՝ Ադեն մտնելով, հեռացել էր երկրից: Նախագահը դիմել է Սաուդյան Արաբիային' խնդրելով միջամտել ստեղծված իրավիճակին:

Մարտի 26-ին Սաուդյան Արաբիան Բահրեյնի, Կատարի, Քուվեյթի, ԱՄԷ-ի օդային ուժերի օգնությամբԵմենում իրականացվել է «Վճռականության փոթորիկ» գործողությունը, որի ավարտից հետո սկսվելէ ռազմական գործողությունների մյուս՝ «Հույսի վերականգնում» փուլը: