Ադրբեջանում մինչև 2018 թվականը բյուջեի ընդհանուր հաշվեմնացորդը բացասական կլինի. ՀԲ

Համաշխարհային բանկը (ՀԲ) մինչև 2018 թվականը դժվարություններ է կանխատեսում Ադրբեջանի տնտեսության համար:

Ինչպես հաղորդում է «Արմենպրես»-ը, Ադրբեջանի հետ 2016-2020 թվականներին գործընկերության գծով ՀԲ-ի հրապարակած շրջանակային փաստաթղթում (CPF) , որը հաստատվել է ՀԲ-ի տնօրնների խորհրդի կողմից 2015 թվականի հուլիսի 21-ին, նշվում է, որ Ադրբեջանում մինչև 2018 թվականը բյուջեի ընդհանուր հաշվեմնացորդը կշարունակի բացասական մնալ:

Ադրբեջանի վերաբերյալ ՀԲ-ի զեկույցում ասվում է, որ 2017 թվականին Ադրբեջանի պետական նավթային հիմնադրամի ակտիվները կնվազեն մինչև 33,172 մլրդ դոլարի:

118 էջանոց զեկույցի համաձայն՝ իրական ՀՆԱ-ի աճը 2015 թվականին կկազմի 1,5 տոկոս, 2016 թվականին' 2,6 տոկոս, 2017 թվականին' 2,7 տոկոս:

Ադրբեջանի նավթաարդյունաբերության ծավալը 2015 թվականին կնվազի 1,5 տոկոսով, 2016 թվականին' 1 տոկոսով, իսկ 2017 թվականին' 1 տոկոսով: Ոչ նավթային ՀՆԱ-ն, որը մինչ այժմ տարեկան 9 տոկոս աճ էր գրանցում, 2015 թվականին կնվազի մինչև 3,6 տոկոս, 2016 թվականին' 3,8 տոկոս, իսկ 2017 թվականին' 3,9 տոկոս:

Բնակչության յուրաքանչյուր շնչին ընկնող ՀՆԱ-ն 2014 թվականին եղած 7,938 հազար դոլարից 2015 թվականին կընկնի և կկազմի 5,447 հազար դոլար, 2016 թվականին կկազմի 5,778 հազար դոլար, 2017 թվականին' 6,094 հազար դոլար:

Արժեզրկումը 2015 թվականին կդառնա երկնիշ' 10 տոկոս, 2016 թվականին' 4,6, 2017 թվականին' 3,5:

Ադրբեջանի բյուջեի ընդհանուր հաշվեմնացորդը վերջին տարիներին առաջին անգամ բացասական կլինի. 2015 թվականին' մինչև 5,1 տոկոս ՀՆԱ, 2016 թվականին' մինչև 2,9 տոկոս ՀՆԱ, 2017 թվականին' մինչև 1,2 տոկոս ՀՆԱ:

Պետական հատվածի պարտքը 2015 թվականին կկազմի ՀՆԱ-ի 14,5 տոկոսը, 2016, 2017 թվականներին' ՀՆԱ-ի 14,6 տոկոսը:

Նոմինալ ՀՆԱ-ն 2014 թվականին եղած' 58,9 մլրդ մանաթից 2015 թվականին կնվազի մինչև 52,6 մլրդ մանաթի, և 2016 թվականին կկազմի 56,5 մլրդ մանաթ, 2017 թվականին' 60,4 մլրդ մանաթ:

Նավթային հատվածի ակտիվները 2014 թվականին եղած' 37, 104 մլրդ դոլարից 2015 թվականին կկրճատվեն մինչև 34,813 մլրդ դոլարի, 2016 թվականին' մինչև 33,595 մլրդ դոլարի, 2017 թվականին' մինչև 33,172 մլրդ դոլարի: