Գերմանիայի ԱԳՆ-ը երկրում թուրք դատախազների գտնվելու մասին տեղեկություն չունի

Գերմանիայի ԱԳՆ խոսնակ Մարթին Շուլցը հայտարարել է, որ իրենք տեղեկություն չունեն Թուրքիայում պաշտոնանկ արված դատախազներ Զաքերիա Օզի եւ Ջելալ Քարայի Գերմանիայում գտնվելու մասին:

Այս մասին, ինչպես հաղորդում է «Արմենպրես»-ը' վկայակոչելով թուրքական «Հուրիեթ» թերթը, Մարթին Շուլցը հայտարարել է գերմանական կառավարության խոսնակների ժողովում:

Նմանատիպ հայտարարությամբ հանդես է եկել նաեւ Գերմանիայի արդարադատության նախարարության խոսնակ Աննե Զիմերմանը: Նա եւս նշել է, որ թուրք դատախազների Գերմանիայում գտնվելու մասին տեղեկություններ իրենք չունեն եւ չեն կարող հաստատել թուրքական մամուլում այդ մասին շրջանառվող լուրերը:

Հետաքրքիր է, որ երեկ Թուրքիայի նախագահ Ռեջեփ Թայիփ Էրդողանը Գերմանիայից պահանջել է հանձնել փախած դատախազներին (Today's Zaman): Ավելին նա սպառնացել է, որ «իր երկիրն ապագայում չի հանձնի որեւէ հանցագործների, եթե Գերմանիան հրաժարվի հանձնել դատախազ Զաքերիա Օզին»:

Թուրքիան որոշ ժամանակ առաջ հայտարարել է, որ երկրից փախուստի դիմած դատախազներ Օզն ու Քարան, առաջինը հայտնվել են Վրաստանում, եւ իբր, այնտեղից էլ անցել են Հայաստան: Սակայն, այն բանից հետո, եր ՀՀ անվտանգության ծառայությունը հերքել էր թուրք դատախազների Հայաստան ժամանելու մասին լուրը, Անկարան անմիջապես հայտարարել է, որ նրանք գտնվում են Գերմանիայում:

Զաքերիա Օզն ու Ջելալ Քարան հանդիսանում են 2013 թվականի դեկտեմբերի 17-25-ին Թուրքիան ցնցած' «Մեծ կաշառք» կոչված կոռուպցիոն սկանդալը բացահայտած բարձրաստիճան դատախազները: Այդ ժամանակ մերկացվել էին Էրդողանի որդու, դստեր եւ փեսայի, ինչպես նաեւ մի քանի նախարարների եւ նրանց որդիների մասնակցությամբ միլիարդների հասնող կոռուպցիոն գործարքները:

Էրդողանն այն ժամանակ հայտարարել էր, որ դրա հետեւում կանգնած են ԱՄՆ-ում վտարանդի արդի իսլամի գաղափարախոս Ֆաթուլլահ Գյուլենի հետեւորդները, որոնք ցանկանում են տապալել իր կառավարությունը:

Այդ խայտառակությունը կոծկելու նպատակով, Էրդողանի հրամանով Զաքերիա Օզն ու գործը ղեկավարող մյուս դատախազները հեռացվեցին զբաղեցրած պաշտոններից եւ նրանց նկատմամբ դատական գործեր հարուցվեցին:

Էրդողանի հանձնարարությամբ աշխատանքից հեռացվել կամ ձերբակալվել են այդ կոռուպցիոն սկանդալը բացահայտած հազարից ավելի փաստաբաններ, դատախազության եւ ոստիկանության աշխատակիցներ: Իրավապահ եւ դատական համակարգերը «գյուլենականներից մաքրելու» գործընթացը Թուրքիայում շարունակվում է մինչ օրս: