Ընտրություններ 2012թ. Քրեական գործի հարուցումը մերժվել է` հանցակազմի բացակայության հիմքով

ՀՀ ԱԺ պատգամավորի թեկնածու Անուշավան Նիկողոսյանից 2012թ. ապրիլի 8-ին ՀՀ ոստիկանության Տաշիրի բաժնում հաղորդում է ստացվել այն մասին, որ նույն օրը Տաշիրի քաղաքապետը խոչընդոտել է գովազդային պաստառները տեղադրելուն:

Փաստի առթիվ նախապատրաստվել են նյութեր, որի ընթացքում Անուշավան Նիկողոսյանը նշել է, որ «ԷԳԱ» ՍՊ ընկերության հետ կնքվել է պայմանագիր' վերջինիս պատկանող, Ստեփանավան և Տաշիր քաղաքներում գտնվող գովազդային վահանակներին իր նախընտրական գովազդային պաստառները տեղադրելու վերաբերյալ:

2012թ. ապրիլի 8-ին հիշյալ ՍՊ ընկերության աշխատակիցներ Կ. Գոգյանը եւ Ա. Մանուկյանը՝ համաձայն նախօրոք ձեռք բերված պայմանավորվածության, մեկնել են Տաշիր քաղաք: Պատգամավորի թեկնածուն հայտնել է, որ ժամը 18:00-ի սահմաններում իրեն է զանգահարել Կ. Գոգյանը՝ ասելով, որ Տաշիր քաղաքում՝ պաստառը տեղադրելու ընթացքում, մի քանի անձանց ուղեկցությամբ իրենց է մոտեցել Տաշիրի քաղաքապետ Նշան Սողոյանը եւ հաշվեհարդար տեսնելու սպառնալիքներով արգելել տեղադրել գովազդային պաստառներն ու ստիպել է հանել դրանք:

Կ. Գոգյանը եւ Ա. Մանուկյանն հերքել են Նշան Սողոյանի կողմից սպառնալու եւ քաղաքից հեռանալու պահանջ դնելու մասին Անուշավան Նիկողոսյանի ներկայացրած հանգամանքը:

Վերջիններս հայտնել են նաեւ, որ Տաշիրի քաղաքապետ Նշան Սողոյանը պահանջել է ներկայացնել գովազդը տեղադրելու թույլտվությունը եւ դրա հիմքերի վերաբերյալ փաստաթղթեր: Տեղեկանալով, որ դրանք բացակայում են՝ առաջարկել է դադարեցնել աշխատանքները եւ դրանք շարունակել' համապատասխան փաստաթղթերի առկայության դեպքում:

Նյութերի նախապատրաստման ընթացքում Նշան Սողոյանի կամ մեկ այլ անձի կողմից Անուշավան Նիկողոսյանի նախընտրական քարոզչական պաստառը փակցնելու, նրա ընտրական իրավունքի իրականացմանը դիտավորությամբ ապօրինաբար խոչընդոտելու, ինչպես նաև՝ Ա. Մանուկյանին եւ Կ. Գոգյանին սպառնալու վերաբերյալ ապացույցներ ձեռք չեն բերվել, այլ հիմնավորվել է, որ Տաշիրի քաղաքապետ Նշան Սողոյանը, իրականացնելով իր պաշտոնական լիազորությունները, փորձել է պարզել գովազդային պաստառը փակցնելու հիմնավորվածությունը, դրա առնչությամբ որեւէ մեկին սպառնալիքներ չի տվել եւ ՀՀ քրեական օրենսգրքով չթույլատրված արարք չի կատարել:
2012թ. ապրիլի 14-ին քրեական գործի հարուցումը մերժվել է՝ հանցակազմի բացակայության հիմքով: