Վրաստանը կարող է միացնել Ասիան ու Եվրոպան ամենակարճ ճանապարհով. Ղարիբաշվիլի

Վրաստանը կարող է լոգիստական կենտրոն դառնալ, հայտարարել է երկրի վարչապետ Իրակլի Ղարիբաշվիլին: Նա հայտնել է Վրաստանում նոր նավահանգիստ կառուցելու մտադրության և այդ նախագծում չինական կողմի հետաքրքրվածության մասին, հայտնում է sputnik-georgia.ru-ն:

«Մենք ձգտում ենք վերածել Վրաստանը լոգիստական կենտրոնի: Մենք մտադիր ենք կառուցել նոր նավահանգիստ, որի ամենամյա բեռնաշրջանառությունը կլինի ավելի քան 100 մլն տոննա: Շատ մեծ հետաքրքրվածություն ունեն չինական ընկերությունները, որոնք ցանկանում են մասնակցել այդ նախագծին»,- հայտարարել է Ղարիբաշվիլին:

Կառավարության ղեկավարը նշել է նաև, որ Վրաստանը կարևորագույն տարանցիկ երկիր է չինական արտադրանքի փոխադրումների համար:

«Վրաստանը կարող է շատ գրավիչ երկիր լինել, որը կկապի Ասիան և Եվրոպան ամենակարճ երթուղիներով: Կարծում եմ՝ այս նախագծում Վրաստանը կարող է կատարել շատ կառուցողական և ապահով դեր»,- ասել է Ղարիբաշվիլին: