«Վիրահայերի միասնության» նախագահը՝ Գևորգ Մհերյանի սպանության մասին (տեսանյութ)

ՀՀ Փոխոստիկանապետ Գևորգ Մհերյանի մահը վիրահայերի գրանցումների հետ կապելը «Վիրահայերի միասնություն» հասարակական կազմակերպության նախագահ, ԱԺ ՀՀԿ խմբակցության պատգամավոր Տաճատ Վարդապետյանը որակեց «ստորություն», թեև հետո խնդրեց «ստորություն» բառը հանել՝ այն կոպիտ համարելով։

«Ես ընդհանրապես հրաժարվում եմ պատասխանել այդ հարցին, որովհետև իրականության հետ ոչ մի եզրեր ու նշանակություն չունեցող բան են ասում», – արձագանքեց Վարդապետյանը՝ պատասխանելով Լուրեր.com–ի այն դիտարկմանը, թե ՍԴՀԿ ներկայացուցիչ Գուրգեն Եղիազարյանի խոսքերով՝ Գևորգ Մհերյանի սպանությունը կարող է կապված լինել 2007–ին գրանցված վիահայերի ցուցակների հետ, որոնց թվում եղել են նաև վրացի հանցագործ տարրեր։ 

Իսկ թե չունի՞ արդյոք Վարդապետյանը մտավախություն, որ վիրահայերի գրանցման պրոցեսում, այնուամենայնիվ, հնարավոր են նման դեպքեր, վերջինս պատասխանեց. «Դա իմ ինֆորմացիայից և իմ երևակայությունից դուրս բան է»։

Հիշեցնենք, որ մի քանի շաբաթ առաջ Գուրգեն Եղիազարյանը Լուրեր.com-ի հետ զրույցում նշել էր, որ, «Երբ սպանեցին Մհերյանին, նա տեղյակ էր մեր ջավախահայության ցուցակներից և այն բանից, թե քանի միլիոն են աշխատել այդ մարդկանց անձնագիր տալու համար: Նրա պնդմամբ, գրանցված ջավախահայերի ցուցակները օգտագործում էին ընտրությունների ժամանակ՝ ընտրակեղծիքներ կատարելու համար։ Բացի դրանից, ըստ Եղիազարյանի, «այդ մարդկանց թվում մի շարք վրացի հանցագործներ նույնպես անձնագրեր են ստացել անձնագրային բյուրոյից։ Խոսքը գնում է ավելի քան երեսուն մարդու մասին»։