Ադրբեջանում ՃՏՊ-ից մեկ զինծառայող զոհվել, մեկն էլ վիրավորվել է

Սեպտեմբերի 9-ի գիշերը Ադրբեջանի Լենքորան քաղաքում Հեյդար Ալիեւի անվան պողոտայում տեղի ունեցած ճանապարհատրանսպորտային պատահարի արդյունքում զոհվել է Ադրբեջանի զինված ուժերի 34-ամյա ենթասպա Ռամին Գիյամեդդին օղլու Մամեդլին եւ ծանր վիրավորվել 24-ամյա զինծառայող (կոչումը չի նշվում) Ռասիմ Նովրուզ օղլու Ումիդովը:

Այս մասին, ինչպես հաղորդում է «Արմենպրես»-ը, հայտնում է report.az լրատվական կայքը:

ՃՏՊ-ի ենթարկված OpelAstra ավտոմեքենայի ղեկին եղել է ենթասպա Մամեդլին: Զոհված և վիրավոր զինծառայողները եղել են Խաչմազի շրջանից և ծառայելիս են եղել միևնույն զորամասում:

Զինծառայողը կորցրել է մեքենայի կառավարումը, բախվել պողոտայի մայթին գտնվող ծառին: Ուժգին հարվածից վարորդը մեքենայից դուրս է շպրտվել, իսկ ծառն ընկել է նրա վրա: Զինծառայող Ումիդովը բազմաթիվ կոտրվածքներով տեղափոխվել է Լենքորանի հոսպիտալ: Փաստի հետ կապված Ռազմական դատախազությունը հետաքննություն է սկսել:

Ադրբեջանի APA լրատվական գործակալությունը լուրը հայտնել է առանց նշելու, որ զոհվածն ու վիրավորը զինծառայողներ են:

Թեեւ Ադրբեջանը շարունակում է սեփական զինուժում գրանցված մահվան դեպքերի ու արտակարգ պատահարների մասին տեղեկությունները թաքցնելու քաղաքականությունը, այդուհանդերձ, ՀՀ ՊՆ եւ ԼՂՀ ՊԲ տեղեկությունների, ինչպես նաև ոչ պաշտոնական աղբյուրների և սոցցանցերի համաձայն' այս տարվա սկզբից մինչ այժմ ադրբեջանական բանակի կորուստը կազմել է առնվազը 103 զինծառայող և 55-ից ավելի վիրավոր: