Թուրքիայում Ֆրանսիայի պատվավոր հյուպատոսը հեռացվել է աշխատանքից` ներգաղթյալներին նավակներ վաճառելու համար

Թուրքիայում Ֆրանսիայի Պատվավոր հյուպատոսը հեռացվել է իր պաշտոնից՝ կապված կասկածների հետ, թե նա փախստականներին նավակներ է վաճառել, հայտնում է ՌԻԱ «Նովոստին»:

Համապատասխան որոշումը կայացրել է Ֆրանսիայի արտաքին գործերի նախարար Լորան Ֆաբիուսը:

Հյուպատոսին աշխատանքից հեռացնելու մասին որոշումն ընդունվել էր այն բանից հետո, երբ թողարկվել էր հեռուստառեպորտաժ, որում ցուցադրվել է լողի համար ապրանքներով խանութ: Խանութի մուտքին կախված են եղել ֆրանսիական դրոշ ու ցուցանակ՝ «Ֆրանսիայի պատվավոր հյուպատոս» գրությամբ: 

Թաքնված տեսախցիկով նկարահանումը դարձել է լրագրողական հետաքննության արդյունք: Ֆրանսիական ԶԼՄ-ների աշխատակիցները ափին նկատել են փչովի նավակներ, որոնցով լողում են ներգաղթյալները, և որոշել են պարզել, թե ով է դրանք նրանց վաճառում: Դա նրանց տարել է ափամերձ Բոդրում քաղաք՝ պատվավոր հյուպատոսի խանութ: