Գերմանիայի Կանաչների կուսակցության համանախագահը Թուրքիայում զենքերը վայր դնելու կոչ է արել

Գերմանիայի Կանաչների կուսակցության համանախագահ, ազգությամբ թուրք Ջեմ Օզդեմիրը մտահոգություն է հայտնել Թուրքիայում վերջին օրերին տեղի ունեցող իրադարձությունների առնչությամբ' հայտարարելով, որ պետք է չեղյալ համարել Անթալիայում նոյեմբերի 15-16-ը նախատեսված G-20-ի գագաթնաժողովը: Ինչպես հաղորդում է «Արմենպրես»-ը, այս մասին տեղեկացնում է թուրքական Demokrathaber.net-ը:

Հորդորելով Թուրքիայում վայր դնել զենքերը և շարունակել հաշտեցման գործընթացը' Օզդեմիրն ընդգծել է. «Մի միջավայրում, որտեղ երկրի մի մասն այրվում է, անընդունելի է արմավենիների տակ հանգիստ միջավայրում նստելը»: Գերմանացի քաղաքական գործիչն ընդգծել է, որ Թուրքիայում ներքին պատերազմական իրավիճակ է, և անհրաժեշտ է, որ համաշխարհային տերությունների ղեկավարները ճնշում գործադրեն Էրդողանի վրա:

«ՆԱՏՕ-ի անդամ երկրի համար տեղի ունեցող զարգացումներն անընդունելի են»,- ասել է նա' հավելելով, որ Թուրքիայում բռնությունները պետք է անհապաղ դադարեցվեն: