ԱՄՆ հատուկ ծառայությունները կանխել են Հռոմի պապի դեմ հնարավոր մահափորձը

ԱՄՆ հատուկ ծառայությունները վերացրել են Հռոմի պապ Ֆրանցիսկոսի դեմ ուղղված անվտանգության սպառնալիքը ԱՄՆ նրա այցի ընթացքում, որը ծրագրված է հաջորդ շաբաթ: Այս մասին հայտարարել է Կոնգրեսի ներկայացուցիչների պալատի ազգային անվտանգության հարցերով կոմիտեի ղեկավար Մայքլ Մաքքոլը. փոխանցում է Lenta.ru-ն՝ հղում անելով CBS News-ին:

Կոնգրեսականի խոսքով՝ տեղեկությունն ինքը ստացել է Գաղտնի ծառայությունից, որը պատասխանատու է բարձրաստիճան անձանց անվտանգության պահպանման համար: «Մասնավորապես, մենք կանխել ենք մեկ նման դեպք»,- ասել է նա:

Մաքքոլը նշել է, որ Հռոմի պապը սիրում է շփվել մարդկանց հետ, ինչը նրա անվտանգության համար լուրջ սպառնալիք է:

Հռոմի պապը Վաշինգտոն, Նյու Յորք և Ֆիլադելֆիա կայցելի սեպտեմբերի 22-27-ը: Վաշինգտոնում նա անձնական հանդիպում կունենա ԱՄՆ նախագահ Բարաք Օբամայի հետ և կդառնա առաջին հովվապետը, ով ներկա կգտնվի Ներկայացուցիչների պալատի ու Սենատի համատեղ նիստին: Նյու Յորքում նա կդիմի ՄԱԿ-ի Գլխավոր ասամբլեային, իսկ Ֆիլադելֆիայում հանդես կգա միգրացիային և կրոնական ազատության հարցերին նվիրված ելույթով, ինչպես նաև կանցկացնի պատարագ:

Մինչ ԱՄՆ այցը Հռոմի պապը կլինի Կուբայում: