Պորոշենկոն Ռուսաստանը և օլիգարխներին համարել է Ուկրաինայի երկու գլխավոր սպառնալիքները

Ուկրաինայի ղեկավարությունն այն կարծիքին է, որ երկրի արևելքում հրադադարի պահպանումը Մինսկի համաձայնագրերի կատարման գլխավոր նախադրյալն է: Այդ մասին, ինչպես տեղեկացնում է «Արմենպրես»-ը, Ուկրաինայի նախագահ Պյոտր Պորոշենկոն հայտարարել է The Washington Post ամերիկյան թերթին, բրիտանական The Independent-ին և գերմանական Die Welt-ին տված հարցազրույցում, որը սեպտեմբերի 13-ին հրապարակվել է ԱՄՆ-ում:

Պորոշենկոն նաև հայտարարել է, որ առանց Կիևի հետ համաձայնեցնելու, Դոնբասում ընտրությունների անցկացումը համարվելու է «կարմիր գիծ», որն անցնելը ձախողման սպառնալիքի տակ կդնի նախորդ պայմանավորվածությունները: «Մինսկի գործընթացը և խաղաղ գործընթացը մեծապես կվտանգվեն, քանի որ դա կլինի Մինսկի համաձայնությունների ուղղակի խախտում»,- ասել է Ուկրաինայի ղեկավարը:

Պատասխանելով Ուկրաինայի ներքին հիմնախնդիրների վերաբերյալ հարցին՝ նախագահը հայտարարել է, որ դրանցից գլխավորը ներկայացնում են օլիգարխները: «Դա մարտահրավեր է Ուկրաինայի համար»,- ասել է նա: «Այժմ մեր առջև ծառացել է երկու սպառնալիք: Թիվ մեկ սպառնալիքը Ռուսաստանն է, թիվ երկու սպառնալիքը՝ օլիգարխները, և մենք առանձնակի ուշադրություն ենք դարձնում այդ երկու սպառնալիքներին», հաղորդել է ՏԱՍՍ-ը: