Թուրքիայում ոստիկանությունը հարձակվել է «Էրդողանին սելֆի արած» հանդեսի վրա

Թուրքական ոստիկանությունը սեպտեմբերի 14-ի լույս կեսգիշերը հարձակվել է «Նոքթա» հանդեսի խմբագրատան վրա այն բանի համար, որ նախօրեին հանդեսը լույս էր տեսել շապիկի վրա զինծառայողի թաղման արարողության տեսարանի ֆոնին «Էրդողանին սելֆի արած» լուսանկարով:

Ինչպես հաղորդում է «Արմենպրես»-ը, «Նոքթա» հանդեսը հայտնի է քաղաքական գործիչների վերաբերյալ ծաղրանկարների հրապարակումներով: Այս անգամ հանդեսը փորձել է այդ «սելֆիով» քննադատել քրդերի նկատմամբ Թուրքիայի Նախագահ Թայիփ Էրդողանի վերջին օրերի քաղաքականությունը, ինչի արդյունքում Քրդիստանի աշխատավորական կուսակցության» (PKK) զինված թևի հետ թուրքական զինուժի բախումներում մեծ թվով զինծառայողներ են զոհվում:

«Նոքթա»-ի գլխավոր խմբագիր Ջեվհերի Գյուվենը Twitter-ի իր էջում ոստիկանության հարձակումը ներկայացրել է այսպես. «Ոստիկանությունն անակնկալ կերպով գիշերվա 01:30-ին հարձակվեց խմբագրության վրա… Երևի «Նոքթա»-ի' Էրդողանի լուսանկարով բոլոր համարները կհավաքվեն: 2007 թվականին Թուրքիայի զինված ուժերը խմբագրատան վրա հարձակվել էին առավոտյան: Սա քաղաքացիական հարձակում է, կատարվեց գիշերվա կեսին»:

Նշենք, որ հունիսի 22-ին Ուրֆայի Սուրուչ քաղաքում քրդական երիտասարդական կազմակերպության միջոցառման ժամանակ ահաբեկչական պայթյունի հետևանքով 32 մարդու զոհվելուց եւ 100-ից ավելի մարդու վիրավորվելուց հետո Թուրքիայի տարածքում ընթացող թուրք-քրդական բախումներում մոտ 100 թուրք զինծառայողներ են զոհվել: