Գերմանիայի Կանաչների կուսակցության համանախագահը կմեկնի Ջիզրե

Գերմանիայի Կանաչների կուսակցության համանախագահ, ազգությամբ թուրք Ջեմ Օզդեմիրը կայցելի օրեր շարունակ շրջափակման մեջ գտնվող թուրքական Ջիզրե' ուսումնասիրություններ անցկացնելու: Ինչպես հաղորդում է «Արմենպրես»-ը' վկայակոչելով թուրքական Demokrathaber.net-ը, քաղաքական գործիչը կլինի նաև Դիարբեքիրում և Մարդինում, որտեղ մի շարք հանդիպումներ կանցկացնի:

Հաղորդվում է, որ Գերմանիայի Կանաչների կուսակցության ղեկավարը կայցելի նաև երկու անգամ հարձակման ենթարկված թուրքական «Հուրիեթ» պարբերականի խմբագրություն:

Ջիզրեում սեպտեմբերի 4-ին ընդունված փողոց դուրս գալու արգելքը շարունակվում է: Ջիզրեի տարբեր հատվածներում շարունակում են լսվել կրակոցների ձայներ: Դադարեցվել է հեռախոսային ցանցի և համացանցի հասանելիությունը: Նշվում է, որ գավառում չկա անգամ էլեկտրականություն: Հացի փռերի մոտ գոյանում են մեծ հերթեր: Հերթական վիրավորների թվում են երեխաներ: Հաց գնելու նպատակով փողոց դուրս եկած 5 տարեկան 3 երեխա ոտքի շրջանում հրազենային վիրավորում է ստացել: Փողոց դուրս գալու արգելքի պատճառով Ջիզրե չեն գնում շտապօգնության հաշվարկները: Մեկ շաբաթվա ընթացքում Ջիզրեում զոհվել է 14 քաղաքացի, շատերը վիրավորվել են: Փողոց դուրս գալու արգելքը հանվել է սեպտեմբերի 12-ի առավոտյան:

Թուրքիայում տեղի ունեցող վերջին զարգացումների առնչությամբ Օզդեմիրն ավելի վաղ հայտարարել էր, որ պետք է չեղյալ համարել Անթալիայում նոյեմբերի 15-16-ը նախատեսված G-20-ի գագաթնաժողովը: Գերմանացի քաղաքական գործիչն ընդգծել էր, որ Թուրքիայում ներքին պատերազմական իրավիճակ է, և անհրաժեշտ է, որ համաշխարհային տերությունների ղեկավարները ճնշում գործադրեն Էրդողանի վրա: «ՆԱՏՕ- ի անդամ երկրի համար տեղի ունեցող զարգացումներն անընդունելի են»,- ասել էր նա' հավելելով, որ Թուրքիայում բռնությունները պետք է անհապաղ դադարեցվեն: