Նյու Յորքում բացվել է ՄԱԿ-ի Գլխավոր ասամբլեայի 70-րդ նստաշրջանը

Աշխարհ 16 Սեպտեմբեր, 2015 11:05

ՄԱԿ-ի Նյու Յորքի կենտրոնակայանում աշխատանքն է սկսել համաշխարհային կազմակերպության Գլխավոր ասամբլեայի 70-րդ նստաշրջանը, տեղեկացնում է «Արմենպրես»-ը:

Առաջին նիստը բացել է ԳԱ-ի նախագահը՝ Դանիայի արտաքին գործերի նախկին նախարար Մոգենս Լիկետոֆտը: Իր ներածական խոսքում նա հույս է հայտնել, որ ԳԱ-ի հոբելյանական նստաշրջանը «հիրավի պատմական կլինի»: Լիկետոֆտը հիշեցրել է, որ տասն օրից ՄԱԿ-ի կենտրոնակայանում տեղի կունենա գագաթնաժողով, որի ընթացքում կհաստատվի մինչև 2030 թվականը գլոբալ զարգացման բնագավառի օրակարգը, որը նպատակամղված է աղքատության և սովի վերացմանը:

Բացի այդ, ԳԱ-ի նախագահը հայտարարել է ՄԱԿ-ի խաղաղապահ գործունեությանը վերաբերող բանաձևի նախագիծը քվեարկության դնելու, ինչպես նաև դեկտեմբերին Տեղեկատվական հասարակության համաշխարհային գագաթնաժողովի նախապատրաստման շուրջ բարձր մակարդակի հանդիպում անցկացնելու պլանների մասին: 2016 թվականի գարնանը Գլխավոր Ասամբլեան հանդիպում կանցկացնի թմրանյութերի դեմ պայքարի և ՄԻԱՎ/ՁԻԱՀ-ին հակազդելու հարցերի շուրջ, հայտնել է Լիկետոֆտը:

ՄԱԿ-ի գլխավոր քարտուղար Պան Գի Մունը բարձր է գնահատել ԳԱ-ի նախագահի կողմից շարադրված աշխատանքի պլանը և հայտարարել է «դրան լիակատար աջակցություն ցուցաբերելու» պատրաստակամության մասին:

«Այս նստաշրջանը նշանավորում է Միավորված ազգերի կազմակերպության հիմնադրման 70-ամյակը: ՄԱԿ-ի Կանոնադրության մեջ ամրագրված սկզբունքներն անցել են ժամանակի ստուգումը»,- ասել է Պան Գի Մունը: Միևնույն ժամանակ նա ուշադրություն է դարձրել այն «տառապանքների մասշտաբների վրա, որոնք շարունակվում են աշխարհում»: «Այսօր ես հատկապես հիշում եմ Սիրիայի ժողովրդին, նրանց, ովքեր սարսափազդու բռնության են ենթարկվում երկրի ներսում, և նրանց, ովքեր փախել են և ամեն կերպ ապաստան են փնտրում ու փորձում են նոր կյանք սկսել»,- նշել է նա:

ԳԱ-ի 70-րդ նստաշրջանի օրակարգում ընդգրկված է 170 թեմա, ներառյալ խաղաղության և անվտանգության պահպանման, զինված հակամարտությունների կանխման, ահաբեկչությանը, ռասսայական խտրականությանը և այլատյացությանը հակազդելու, շրջակա միջավայրի պաշտպանության, երկրների կայուն զարգացմանն աջակցման, միջուկային չտարածման ռեժիմի պահպանման, մարդու իրավունքների պաշտպանության և իրավունքի գերակայության ապահովման հարցերը:

Ավանդաբար նստաշրջանի բացումից մեկ շաբաթ անց Գլխավոր ասամբլեայի շրջանակներում ընթանում է ընդհանուր քաղաքական բանավեճ, որի ընթացքում ՄԱԿ-ի անդամ երկրների պատվիրակները կարող են արծարծել ցանկացած հարց:

Սակայն այս տարի ընդհանուր բանավեճերը հետաձգվել են ավելի ուշ փուլ, իսկ ԳԱ-ի շրջանակներում առաջին մեծ միջոցառումը կլինի զարգացման հարցերին նվիրված գագաթնաժողովը, որը կանցկացվի սեպտեմբերի 25-27-ին: Դրա ընթացքում կհաստատվի 2015-2030 թվականներին գլոբալ սոցիալ-տնտեսական զարգացման օրակարգը, որի նախագծին ՄԱԿ-ի անդամ երկրները հավանություն են տվել մի քանի շաբաթ առաջ:

Գագաթնաժողովի ավարտից մեկ օր անց ՄԱԿ-ի կենտրոնակայանում կմեկնարկի ընդհանուր քաղաքական բանավեճը, որին այս տարի սպասվում է պետությունների ու կառավարությունների ավելի քան 150 ղեկավարի, ինչպես նաև ՄԱԿ-ի անդամ պետությունների արտաքին գործերի տասնյակ նախարարների մասնակցությունը: Երկրների պատվիրակությունների ելույթները կշարունակվեն մինչև հոկտեմբերի 3-ը:

Գլխավոր ասամբլեան ՄԱԿ-ի գլխավոր խորհրդակցական մարմինն է: 1946 թվականին՝ Միավորված ազգերի կազմակերպության կազմավորումից մեկ տարի անց, դրա կազմում կար 51 պետություն, այժմ՝ 193: ՄԱԿ-ին անդամակցած վերջին երկիրը 2011 թվականին դարձել է Հարավային Սուդանը, հաղորդել է ՏԱՍՍ-ը: