Երկրորդ համաշխարհային պատերազմի ժամանակ նացիստները թմրանյութ էին օգտագործում. գերմանացի պատմաբան

Գերմանացի պատմաբան Նորման Օլերը իր «Բացարձակ հաճույք» նոր գրքում պնդում է, որ Երկրորդ համաշխարհային պատերազմի տարիներին նացիստները բյուրեղյա մետամֆետամին էին օգտագործում: Այս մասին գրում է The Independent-ը:

Նրա խոսքով` գերմանական զորքերի շարքում մետամֆետամինի մի տեսակ էին տարածում, որը ստեղծվել է 1937 թ-ին նացիստների կողմից, և ստացել «պերվիտին» անվանումը:

Տվյալ թմրամիջոցն օգտագործվում էր սթրեսի և հոգնածության դեմ պայքարելու համար, ինչպես նաև էյֆորիայի: Ըստ պատմաբանի, նացիստական բանակում անմիջապես չեն հասկացել, թե ինչ է թմրանյութը: «Զինվորները կարծում էին, թե այդ դեղամիջոցի օգտագործումը նույնն է, ինչ սուրճ ըմպելը»: Իսկ բանակի ղեկավարությունն անմիջապես հասկացավ, որ նման հաբերը «խթանում» են զինվորներին, այդ իսկ պատճառով դրանք փորձարկվել են 1939 թ.-ին, որից հետո գերմանացիները պատվիրել են ևս 35 միլիոն չափաբաժին իրենց բանակի համար` Ֆրանսիայում 1940 թ. պայքարից առաջ:

«Պերվիտինը նպաստում էր նրան, որ ներխուժած նացիստները առույգ էին մնում», - գրում է պատմաբանը:

Իր գրքում, նա նաև նշում է, որ Հիտլերը կախվածություն է ունեցել «յուկոդալա» թմրանյութից: Այդ թմրամիջոցից ազդեցությունը երկու անգամ ավելի ուժեղ է, քան մորֆինից: Այն առաջին անգամ ներարկվել է Հիտլերին`1943 թ. Մուսոլինինի հետ հանդիպումից առաջ: