Սարիբեկ Սուքիասյանը, Սամվել Ալեքսանյանը, Գագիկ Ծառուկյանը նախընտրական ծախսեր կատարում են. ԿԸՀ

ԿԸՀ-ն հաղորդագրություն է տարածել, որում անդրադարձել է «Ազատություն» ռադիոկայանի «Ծառուկյանն առայժմ քարոզարշավում գումար չի՞ ծախսել» նյութին։

«Տեղեկացնում ենք, որ Ազգային ժողովի մեծամասնական ընտրակարգով պատգամավորության թեկնածուների նախընտրական հիմնադրամներ կատարված մուծումների և դրանց օգտագործման վերաբերյալ նյութը թերի է, ոչ ամբողջական և չի արտացոլում իրական պատկերը, ինչը ներկայացված է Հայաստանի Հանրապետության կենտրոնական ընտրական հանձնաժողովի վերահսկիչ-վերստուգիչ ծառայության (այսուհետ' ծառայություն) կողմից կազմված տեղեկանքում: Մասնավորապես' լրագրողը, հղում կատարելով ծառայության տեղեկանքին, նշել է, որ ԱԺ մեծամասնական ընտրակարգով պատգամավորի թեկնածուներ Արտակ Սարգսյանի, Սամվել Ալեքսանյանի, Սարիբեկ Սուքիասյանի, Մուրադ Գուլոյանի և Գագիկ Ծառուկյանի նախընտրական հիմնադրամներ համապատասխանաբար կատարվել են 1.960.000, 2.577.010, 5.000.000, 800.000, 1.000.000 դրամի մուտքեր, և նրանցից ոչ մեկը չի կատարել քարոզչական ծախսեր, մինչդեռ համապատասխան ընտրատարածքներում տեղադրված են նրանց մեծադիր քարոզչական պաստառները:

Հարկ է նշել, որ ծառայության կողմից կազմված տեղեկանքի վերջին սյունակը վերնագրված է «ԸՕ 26-րդ հոդվածի 2-րդ մասով նկարագրված ապրանքների և ծառայությունների ձեռք բերման հետ կապված, դեռ չվաճարված դրամական պարտավորությունների չափը», որտեղ ամրագրված են թեկնածուներից յուրաքանչյուրի' ԸՕ 26-րդ հոդվածի 2-րդ մասով նկարագրված ապրանքների և ծառայությունների ձեռք բերման հետ կապված, դեռ չվաճարված դրամական պարտավորությունների չափը: Արտակ Սարգսյանի դեպքում այն կազմում է 2.573.523, Սամվել Ալեքսանյանի դեպքում' 2.148.403, Սարիբեկ Սուքիասյանի դեպքում' 959.100, Մուրադ Գուլոյանի դեպքում' 674.400, և Գագիկ Ծառուկյանի դեպքում' 1.021.200 դրամ: Վերոգրյալից պետք է ենթադրել, որ թեև թեկնածուները իրենց նախընտրական հիմնադրամներից դեռևս փաստացի ծախսեր չեն կատարել, բայց համապատասխան քաղաքացիաիրավական գործարքների արդյունքում ձեռք են բերել ընտրական օրենսգրքի 26-րդ հոդվածի 2-րդ մասով նախատեսված ապրանքներ և ծառայություններ, որոնց գինը' շուկայական արժեքով, ամրագրել են իրանց նախընտրական հիմնադրամներ կատարված մուծումների և դրանց օգտագործման վերաբերյալ հայտարարագրերի «ԸՕ 26-րդ հոդվածի 2-րդ մասով նկարագրված ապրանքների և ծառայությունների ձեռք բերման հետ կապված, դեռ չվաճարված դրամական պարտավորությունների չափը» սյունակում: Այդ պայմանագրային պարտավորությունները նրանք կարող են կատարել պայմանագրով նախատեսված ժամկետում' մինչև քվեարկության օրը: Ընտրական օրենսգրքի 26-րդ հոդվածի 8-րդ մասի համաձայն թեկնածուները կենտրոնական ընտրական հանձնաժողովի թույլտվությունը ստանալուց հետո իրենց հիմնադրամներից վճարումներ կարող են կատարել նաև քվեարկության օրվանից հետո, բայց մինչև քվեարկության օրը կատարված գործարքների համար»,- ասված է ԿԸՀ հաղորդագրությունում։