Էրդողանը փողոցներ է հանել իր համակիրներին

Թուրքիայի իշխանությունները Ստամբուլում «Միլիոնավորներն ահաբեկչության դեմ միաձայն» կարգախոսով հանրահավաք են կազմակերպել Ստամբուլում, որին մասնակցել են Թուրքիայի նախագահ Ռեջեփ Թայիփ Էրդողանը, խորհրդարանի խոսնակ Իսմեթ Յըլդըզը և վարչապետ Ահմեթ Դավութօղլուն:

Այս մասին, ինչպես հաղորդում է «Արմենպրես»-ը, հայտնում է «Անատոլու» լրատվական գործակալությունը:

Ենիքափըի հրապարակում հավաքված հազարավոր քաղաքացիները «Շեհիդները չեն մեռնում, Հայրենիքն անբաժանելի է», «Թուրքերն ու քրդերը եղբայրներ են, իսկ անջտողականները' դավաճաններ» բովանդակությամբ լոզունգներ են հնչեցրել:

Դրա հետ միասին Թուրքիայի քրդաբնակ շրջաններում շարունակվում են թուրքական զինուժի և քրդերի միջև զինված բախումները: Թուրքիայում ինքնավարության համար պայքարող Քուրդիստանի աշխատավորական կուսակցության (PKK) զինված թևի մարտիկները Հաքքարիի շրջանում պայթեցրել են զինվորականներ փոխադրող միկրոավտոբուսը, որի հետևանքով զոհվել են ավտոմեքենայում գտնվող բոլոր 11 զինծառայողները: PKK-ն պայթյուններ է իրագործել Դիարբեքիրի, Բիթլիսի, Շիռնաքի և այլ քրդաբնակ շրջաններում' մեծ վնասներ պատճառելով թուրքական անվտանգության մարմիններին:

Ստամբուլում իշխանությունների կազմակերպած' «Միլիոնավորներն ահաբեկչության դեմ միաձայն» հանրահավաքի հետ կապված Թուրքիայի գլխավոր ընդդիմադիր Ժողովրդահանրապետական կուսակցության (ԺՀԿ) առաջնորդ Քեմալ Քըլըչդարօղլուն երկրում ահաբեկչության գոյության համար մեղադրել է իշխանություններին: Քըլըչդարօղլուն Twitter-ի իր էջում ուղերձ է հղել իշխանություններին' գրելով, որ «երգերով և կարգախոսներով հանրահավաքներով ահաբեկչության դեմ պայքարում են այն սնած' մեծացրածները, որոնք մերժում են ահաբեկչության արմատներն ուսումնասիրելու մեր կոչերը»: