Առաջիկայում Ճանապարհային ոստիկանությունը վերակազմավորվելու է Պարեկային ծառայության

Ապրիլի 19-ին ՀՀ ոստիկանության պետ, գեներալ-լեյտենանտ Վլադիմիր Գասպարյանն աշխատանքային հանդիպում ունեցավ Ճանապարհային ոստիկանության անձնակազմի հետ:

Անդրադառնալով ընթացող բարեփոխումներին՝ ոստիկանության պետը նշեց, որ չնայած որոշակի առաջընթացին, արդյունքները չեն բավարարում ոչ ոստիկանության ղեկավարության պահանջը, ոչ էլ, առավել ևս, այն սպասելիքները, որ ծառայությունից ունի հասարակությունը:

Վլադիմիր Գասպարյանը նշելով ճանապարհային ոստիկանների ծառայության մեջ արձանագրված թերություններն ու բացթողումները՝ ընդգծեց, որ սկզբունքային սխալ է աշխատանքն, այսպես ասած, սպասարկման ոլորտներով սահմանափակելը. հատկապես արտաքին ծառայություն իրականացնող ոստիկանը պետք է տեսադաշտում ունենա և անհապաղ արձագանքի ցանկացած իրավախախտման՝ անկախ դրա տեսակից ու բնույթից:

Անդրադառնալով Ճանապարհային ոստիկանության բուն գործառույթներին ու խնդիրներին՝ ոստիկանության պետը նշեց, որ շուտով մայրաքաղաքում ճանապարհային երթևեկության անվտանգությունը հիմնականում վերահսկվելու է տեսադիտարկման սարքերով, իսկ առաջիկայում Ճանապարհային ոստիկանությունը վերակազմավորվելու է Պարեկային ծառայության:

Սա նախատեսվող բարեփոխումների մի մասն է, իսկ ընդհանրապես հաջողության գրավականը, ընդգծեց Վլադիմիր Գասպարյանը, ոստիկանի ներքին բարեփոխումն է, իր կոչման գիտակցումն ու անմնացորդ ծառայությունը երկրին և հասարակությանը:

Ամփոփելով հանդիպումը՝ ոստիկանության պետ Վլադիմիր Գասպարյանը համոզմունք հայտնեց, որ Ճանապարհային ոստիկանության անձնակազմը կարճ ժամանակում կշտկի բոլոր թերությունները և օրինակելի ծառայությամբ կվայելի հասարակության վստահությունը: