Ադամ Շիֆը մտադիր է Հռոմի պապին առաջադրել որպես Խաղաղության Նոբելյան մրցանակի թեկնածու

ԱՄՆ կոնգրեսական Ադամ Շիֆը շրջանառության մեջ է դրել նամակ Հռոմի պապ Ֆրանցիսկոսին 2016 թվականի Խաղաղության Նոբելյան մրցանակի թեկնածու առաջադրելու վերաբերյալ: Ինչպես հաղորդում է «Արմենպրես»-ը, այս մասին տեղեկացնում է ամերիկյան Washington Post պարբերականը:

«Ֆրանցիսկոս պապը խաղաղության հզոր ջատագով է եղել, ով կոչ է արել դադարեցնել հակամարտությունն ազգերի միջև: Նա հորդորել է աշխարհին օգտագործել դիվանագիտությունն ու բանակցությունները վեճերը կարգավորելու համար, այլ ոչ թե կիրառել ռազմական ուժ, պարտադրել կամ վախեցնել»,- նշել է կոնգրեսականը' ընդգծելով, որ այն արժեքները, որոնցով առաջնորդվել է Հռոմի պապը, ընկած են Նոբելյան խաղաղության մրցանակի սկզբունքների հիմքում: Նա ընդգծել է նաև գլոբալ տաքացման, երկրագնդի կենսամիջավայրի աղտոտման, ինչպես նաև փախստականների խնդրով Ֆրանցիսկոսի մղած համառ պայքարի կարևորությունը:

Դեմոկրատներից և Պահպանողականներից ստորագրություններ ստանալուց հետո' Շիֆը մտադիր է նամակն ուղարկել Նոբելյան հանձնաժողով:

Հռոմի Ֆրանցիսկոս պապի' Խաղաղության Նոբելյան մրցանակ շահելու փաստը կլինի պատմական, քանի որ մինչ օրս ոչ մի Հռոմի պապ նման մրցանակ չի ստացել: