Սերբիան փակել է Խորվաթիայի հետ սահմանը՝ դադարեցնելով բեռնաշրջանառությունը

Սերբիայի իշխանությունները փակել են խորվաթական բեռների ներկրումը և Խորվաթիայում գրանցված բոլոր փոխադրամիջոցների (բեռնատարների, նավերի, գնացքների) մուտքը երկիր ի պատասխան այն սահմանափակումների, որոնք մտցրել է հարևան երկիրը: Այդ մասին, ինչպես տեղեկացնում է «Արմենպրես»-ը, հայտարարել է Սերբիայի ներքին գործերի նախարար Նեբոյշա Ստեֆանովիչը:

Անցյալ շաբաթ Խորվաթիան գաղթականների հոսքից պաշտպանվելու պատրվակով փակել է Սերբիայի հետ սահմանի ութ վերահսկիչ անցակետերից յոթը, իսկ վերջինը, որը մնացել է Բելգրադի և Զագրեբի միջև ձգվող կենտրոնական ավտոմայրուղու վրա, փակվել է բեռնատար ավտոմոբիլների համար:

«Այս պահից Սերբիայի ոստիկանությունը թույլ չի տա սահմանը հատել ո՛չ Խորվաթիայում գրանցված բեռնատար ավտոմոբիլներին, ո՛չ էլ այն բեռնատարներին, որոնք տանում են Խորվաթիայում արտադրված ապրանքներ»,- հայտարարել է Ստեֆանովիչը:

Նախարարը ճշտել է, որ միջոցները ձեռնարկվում են երկրի բոլոր սահմաններին, այլ ոչ թե միայն սերբա-խորվաթական սահմանին, և բացի բեռնատար ավտոմոբիլներից, տարածվում են նավերի և գնացքների վրա: Նրա խոսքով՝ դրանով իսկ Սերբիան «պաշտպանում է իր պետականությունը, ինքնիշխանությունը և իր ապագան», հաղորդել է ՌԻԱ Նովոստին: