Խադիջա Իսմայիլովային թույլ չեն տվել տեսակցել ընտանիքի անդամների հետ

Ադրբեջանցի լրագրող, «Ազատություն» ռադիոկայանի ադրբեջանական գրասենյակի աշխատակցուհի Խադիջա Իսմայիլովային թույլ չեն տվել հանդիպել ընտանիքի անդամների հետ: Ինչպես հաղորդում է «Արմենպրես»-ը, այս մասին «Ազատություն» ռադիոկայանի ադրբեջանական ծառայության թղթակցի հետ զրույցում հայտնել է Խադիջայի մայրը' Էլմիրա Իսմայիլովան:

«Այժմ տոն է, սակայն մեզ թույլ չտվեցին տեսնել նրան: Մենք միայն հեռախոսով ենք զրուցել»,- հայտնել է Էլմիրան' նշելով, որ նախկինում կարողացել են ամեն շաբաթ մեկ անգամ տեսնվել:

Խադիջա Իսմայիլովան սեպտեմբերի 1-ին ծանր հանցագործությունները քննող Բաքվի դատարանի կողմից դատապարտվել է 7 տարի և 6 ամիս ազատազրկման' զրկվելով 3 տարի ղեկավար պաշտոն վարելու իրավունքից: Դատարանն Իսմայիլովային անմեղ է ճանաչել 125-րդ հոդվածով (ինքնասպանության դրդում)' նշելով, որ այս ա ռումով չկան բավարար ապացույցներ:

Խադիջա Իսմայիլովան Ադրբեջանի իշխանությունների թիրախ է դարձել իր լրագրողական գործունեության համար: Իսմայիլովան հանդիսանում է Ադրբեջանում իշխանության վերին օղակներում կոռուպցիոն փաստերի լրագրողական հետաքննությունների հեղինակ, որոնց արդյունքում բացահայտվել է նաև Ադրբեջանի նախագահ Իլհամ Ալիևի և նրա ընտանիքի օֆշորյան գոտիներում ունեցած հարյուրավոր միլիոն դոլարների հասնող ունեցվածքը: Վերջին տարիներին նա թոք-շոու էր վարում «Ազատություն» ռադիոկայանի ադրբեջանական ծառայությունում: