Ալիևը խիստ կոռումպացված ռեժիմի ղեկավար է. ԱՄՆ Կոնգրեսի զեկույց

ԱՄՆ-ի Կոնգրեսում շարունակվում է Ադրբեջան կասկածելի այցերի հետ կապված աղմուկը: Ադրբեջանի կառավարության փողերով կոնգրեսականների՝ Բաքու կատարած այցերին զուգահեռ թիրախ է դարձել նաև Կոնգրեսի էթիկայի հանձնաժողովը: Դրա պատճառը հանձնաժողովի նախագահության կողմից այդ դեպքերը քողարկելու ջանքերն են: Այդ հարցի հետ կապված բազմաթիվ քննադատություններից հետո Էթիկայի հանձնաժողովում հետազոտություն է կատարվել, և արդյունքները ներկայացվել հանձնաժողովին: Սակայն հանձնաժողովի ղեկավարությունը հրաժարվել է զեկույցը հանրությանը ներկայացնելուց: Հարցի հետ կապված ԱՄՆ-ի Ազգային իրավունքի և քաղաքականության կենտրոնն ընդարձակ նյութ է պատրաստել, որում Ադրբեջանում առկա վարչակարգը քննադատության է ենթարկվել որպես աշխարհի ամենակոռումպացված իշխանություն:

Ինչպես հաղորդում է «Արմենպրես»-ը, The Washington Post-ին հաջողվել է ձեռք բերել այդ զեկույցը և ներկայացնել հանրությանը:

Զեկույցում ասվում է, որ Կոնգրեսի էթիկայի հանձնաժողովում Ջոն Բոների համար խոսնակի պարտականությունն անհաջող ավարտ է ունեցել: Նա հրաժարվել է մի շարք խիստ կարևոր բարեփումներից և օգնել Էթիկայի հանձնաժողովի անդամների կողմից թույլ տրված իրավական խախտումները քողարկելու ավանդույթի վերականգնվելուն:

Ներկայումս Բոները Էթիկայի հանձնաժողովի նախագահ, Հանրապետական Չառլզ Դենթլի հետ միասին ջանում է «մաքուր հանել» Կոնգրեսի Ներկայացուցիչների պալատի 10 անդամներին' 2013 թվականին Ադրբեջան կատարած կասկածելի այցի հետ կապված ստեղծված աղմուկից:

Հուլիսի 31-ին Էթիկայի հանձնաժողովը հայտարարել է, որ 10 կոնգրեսականների' Ադրբեջան կատարած այցի ժամանակ որևէ իրավական կամ կանոնադրական խախտում չի հայտնաբերվել: Այսինքն, «այլևս այդ թեմայի շուրջ հերթական հետազոտության կարիք չկա, և հարցը փակված է»:

Սակայն հանձնաժողովի բարեփոխման կողմնակից լիբերալ և պահպանողական խմբերն Էթիկայի հանձնաժողովի ղեկավարությունից պահանջել էին ամբողջությամբ հրապարակել կոնգրեսականների' Ադրբեջան կատարած այցի հետ կապված հետազոտությունների արդյունքները:

Զեկույցի համաձայն' կոնգրեսականների այցը Բաքու կազմակերպել էին ոչ առևտրական կառույցները: Իսկ իրականում նրանց այցերի ծախսերը վճարել է Ադրբեջանի Հանրապետության պետական նավթային ընկերությունը:

«Գտնում ենք, որ այդ զեկույցը հաստատելու է կոնգրեսականների կողմից ներքին կարգապահական կանոնները բացահայտ կերպով խախտելու փաստերն Էթիկայի հանձնաժողովի կողմից քողարկելու ջանքերը»,- հայտնել է Ազգային իրավունքի և քաղաքականության կենտրոնի նախագահ Քեն Բիմը:

Ադրբեջանը կենտրոնական Ասիայում գտնվող երկիր է: Այդ երկիրը երկաթե բռունցքով կառավարում է աշխարհի ամենակոռումպացված իշխանություններից մեկի ղեկավար Իլհամ Ալիևը: Գաղտնիք չէ, թե Կոնգրեսից ինչ է ուզում Ադրբեջանի պետական նավթային ընկերությունը: Իրանի ազգային նավթային ընկերության գործընկեր Ադրբեջանի պետական նավթային ընկերությունը կարողացել էր «Շահդենիզ» գազային հանքահորում հաջողությամբ խուսափել Իրանի դեմ պատժամիջոցներից:

Չնայած կոնգրեսականների Ադրբեջան կատարած կասկածելի այցի հետ կապված զեկույցը ներկայացվել էր Էթիկայի հանձնաժողովին, հանձնաժողովն այն չէր հրապարակել: The Washington Post թերթին հաջողվել էր ձեռք բերել զեկույցը և հրապարակել մայիսի 13-ին:

Զեկույցում ցույց է տրվել, որ 10 կոնգրեսականներ 2013 թվականին Բաքվում կազմակերպված համաժողովին մասնակցել են Ադրբեջանի պետական նավթային ընկերության փողերով' խախտելով Կոնգրեսի կանոնադրությունը: Այդ անտեղի այցից օգտվել են Կոնգրեսի պատվիրակության 32 անդամներ:

Նրանցից մեկն իրենց պաշտպանելու ժամանակ մասնակիորեն խոստովանել է, որ չի իմացել, որ այցի հետ կապված ծախսերը հոգացել է Ադրբեջանի պետական նավթային ընկերությունը: Սակայն այս հարցի հետ կապված հետազոտություն անցկացնողները պարզել են, որ Բաքվում այդ համաժողովի ժամանակ դահլիճում Ադրբեջանի պետական նավթային ընկերության մեծ թվով բաներներ են եղել: Բաքվի կոնֆերանսին մասնակցած կոնգրեսական Իվետա Դ.Կլարկը միաժամանակ Էթիկայի հանձնաժողովի անդամ է: