Ադրբեջանում խոսում են ԱԳՆ ղեկավար Էլմար Մամեդյարովի հեռանալու մասին

Ադրբեջանում ինտենսիվորեն խոսում են արտաքին գործերի նախարար Էլմար Մամեդյարովի' մոտ ժամանակում պաշտոնանկության մասին: Այդ խոսակցություններն ավելի հաճախակիացել են արտասահմանյան երկրներում Ադրբեջանի դեսպանությունների որոշ դիվանագետների կողմից ծառայության երկրներում ապաստան խնդրելու փաստերից հետո: Այդ երևույթը խիստ անհանգստացրել է Ադրբեջանի իշխանության վերին օղակներին, որոնց մոտ կարծիք է ամրապնդվել, որ Էլմար Մամեդյարովը չի կարողանում պատշաճ կերպով վերահսկել դեսպանատների աշխատանքը:

Ինչպես հաղորդում է «Արմենպրես»-ը, minval.az-ն այդ առնչությամբ գրում է, որ այն ժամանակ, երբ Ադրբեջանը գտնվում է Հայաստանի և Արևմուտքի տեղեկատվական ճնշման տակ, Ադրբեջանի ԱԳՆ-ում դիվանագետների ապաստան խնդրելու հետ կապված միմյանց հետևող սկանդալներն իշխանություններին ստիպել են շտապ կադրային փոփոխությունների դիմել գերատեսչությունում:

Էլմար Մամեդյարովը Ադրբեջանի արտաքին քաղաքական գերատեսչությունը ղեկավարում է 2004 թվականի ապրիլից:

Ադրբեջանի 2015 թվականի առաջին կիսամյակի սոցիալ-տնտեսական զարգացման արդյունքներին նվիրված խորհրդակցության ժամանակ Ադրբեջանի ղեկավար Իլհամ Ալիևը խստորեն քննադատել էր ԱԳՆ-ի աշխատանքը' հայտարարելով, որ Ադրբեջանի արտաքին քաղաքականությունը «չի համապատասխանում երկրի նկատմամբ դրսևորվող վերաբերմունքին»:

Կայքի աղբյուրների համաձայն' Էլմար Մամեդյարովին փոխելու պլանը օրակարգ էր եկել 2013 թվականին տեղի ունեցած նախագահական ընտրություններից հետո, երբ Ադրբեջանի իշխանությունները խստացրել էին Ղարաբաղյան հակամարտության բանակցություններում հռետորաբանությունը: Պարզվում է, որ այդ ժամանակ, երբ պաշտպանության նախարար Սաֆար Աբիևին փոխարինեցին Զաքիր Հասանովով, պետք է փոխվեր նաև ԱԳՆ ղեկավարը' Ալիևի մշակած պլանով Ղարաբաղյան հակամարտության հարցում «հարձակողական դիվանագիտության անցնելու» համար:

Այժմ Ադրբեջանում գտնում են, որ Մամեդյարովին չի հաջողվել «օգտվել» «հարձակողական դիվանագիտություն» ներդնելու հարցում Նախագահի տված հնարավորությունից: Լեռնային Ղարաբաղի ղեկավարությանն ուղղված արատասահման այցելելու հրավերները, արտասահմանյան երկրների պատվիրակությունների այցերը ԼՂ նույնպես համարվում են ԱԳՆ-ի արտաքին քաղաքական կուրսի «անատամ դիվանագիտության» արդյունք:

Իշխանական մարմիններից կայքին հասած տեղեկություններով' Մամեդյարովի պաշտոնանկության վերաբերյալ վերջնական որոշումն արդեն ընդունված է: Տեղեկացված աղբյուրները հայտնում են, որ նոյեմբերի 1-ին խորհրդարանական ընտրությունների անցկացումից հետո Էլմար Մամեդյարովը կնշանակվի ՄԱԿ-ում Ադրբեջանի մշտական ներկայացուցիչ, իսկ 2014 թվականից այդ պաշտոնը զբաղեցնող Յաշար Ալիևը կնշանակվի փոխարտգործնախարար:

Ադրբեջանում խոսում են նաև, որ Մամեդյարովը կփոխարինվի փոխարտգործնախարար Արազ Ազիմովով, որն այդ ոլորտում աշխատում է սկսած 1989-1990-ական թվականներից, իսկ փոխարտգործնախարարի պաշտոնը զբաղեցնում է 1994 թվականից:

Ադրբեջանի ԱԳՆ-ի' «հարձակողական դիվանագիտության» անցնելու պլանի համաձայն' Արազ Ազիմովին զուգահեռ Ադրբեջանի ԱԳՆ ղեկավարի պաշտոնի հավակնորդներ են համարվում նաև Ղարաբաղյան հարցում «սկզբունքային» դիրքորոշում ունեցող, Ադրբեջանի նախագահի աշխատակազմի ղեկավարի տեղակալ Նովրուզ Մամեդովը:

Ըստ կայքի' Ադրբեջանի քաղաքական ետնաբեմում ԱԳՆ ղեկավարի պաշտոնի հավակնորդ են համարում նաև պատգամավոր Ազայ Գուլիևին, ում Ադրբեջանում համարում են «հայերի դեմ տեղեկատվական պատերազմում լուրջ ներդրում ունեցած անձ»: