Շոու-ծրագրից հետո կշրջեմ Հայաստանով. Եվգենի Պլուշչենկո

Օլիմպիական խաղերի կրկնակի, աշխարհի առաջնության եռակի, Եվրոպայի առաջնության բազմակի չեմպիոն Եվգենի Պլուշչենկոն մեծ ակնկալիքներ ունի Երևանում կայանալիք «Սառույցի թագավորներ» շոու-ծրագրից. տեղեկացնում է Հայաստանի օլիմպիական կոմիտեի կայքը:

«Դեռևս 2008 թվականին Հայաստանում ունեցել եմ ցուցադրական 2 ելույթ, որոնք մեծ արձագանք գտան այստեղ: Հիմա նորից դադար եմ վերցրել մարզական մրցաշարերից և բաց կթողնեմ այս մրցաշրջանը: Փոխարենը համաշխարհային շրջագայության եմ մասնակցում, որն արդեն մեկնարկել է: Երևանում հաջորդ ամիս կայանալիք ներկայացման ժամանակ ձեզ կներկայանամ նոր շոու-ծրագրով: Կփորձենք զարմանցենլ հանդիսատեսին և հասկանալ նրանք արձագանքը: Ինձ հետ ամեն ինչ կարգին է: ԶԼՄ-ներում լուրեր էին շրջանառվում, որ Պլուշչենկոն կրկին կվիրահատվի, բայց ես լավ եմ, ամեն ինչ կարգին է: Շարունակում եմ մարզվել»:

«Ես մեծ ցանկություն ունեմ մասնակցելու հաջորդ Օլիմպիական խաղերին, առաջին հերթին ինքս ինձ ապացուցելու համար, որ դա հնարավոր է անել (2018 թվականի Օլիմպիական խաղերի Պլուշչենկոյի համար կլինեն 5-րդ խաղերը): Իհարկե, սարսափելի դժվար կլինի, բայց ինչո՞ւ ոչ: Հուսեյն Բոլտը, Մայքլ Ֆելպսը, Ելենա Իսինբաևան յուրօրինակ են, ես ևս կփորձեմ ինչ-որ չափով նրանց հասնել»:

«Ցավոք սրտի, Հայաստանում չկան գեղասահքի համար նախատեսված սահադաշտեր: Մենք ժամանակին փորձեցինք «Պլուշենկո»-ի անվան մարզադպրոց բացել այստեղ, սակայն եթե տարվա մեջ միայն մեկ ամիս կարող ես սահել այդ սառույցի վրա, ապա երեխան չի կարող մարզվել: Հայաստանը ժամանակին լավ մարզիկներ ուներ, ինչպես օրինակ իմ մենեջեր Արի Զաքարյանն էր: Պարզապես ղեկավար այրերը պետք է աջակցություն ցուցաբերեն մարզաձևի զարգացման համար: Միայն ֆուտբոլ և շախմատ խաղալով պետք չէ սահմանափակվել»:

«Ես շատ ընկերներ ունեմ Երևանում: Նոյեմբերին կայանալիք շոու-ծրագրից հետո կշրջենք երկրով մեկ: Նախորդ անգամ այցի ժամանակ մենք եղել ենք Հայոց Ցեղասպանության զոհերի հիշատակը հավերժացնող հուշահամալիրում: Դուք հրաշալի կառույցներ ունեք, ինչպիսին մարզահամերգային համալիրն է: Դեռևս 2008-ին, երբ եղա Հայաստանում, շոու ծրագրում համար ունեի «Իմ Հայաստան» երգի ուղեկցությամբ: Որն, ի դեպ, իմ սիրելի երգն է: Ես այն իմ «Այփադ»-ում (Ipad) ունեմ»: